ۇلتتىق قۇراما تاعى ۇپايسىز قالدى

بۇگىن «استانا-ارەنا» ستاديونىندا فۋتبولدان 2022 جىلعى الەم چەمپيوناتىنىڭ ىرىكتەۋ ءتۋرنيرىنىڭ اياسىندا قازاقستان ۇلتتىق قۇراماسى فينليانديا كومانداسىمەن كەزدەسىپ، 0:2 ەسەبىمەن جەڭىلىپ قالدى.

بۇل كەزدەسۋدە سۋومي ەلىنىڭ سايىپقىراندارى وتە ساۋاتتى ويىن ورنەگىن كورسەتىپ، الاڭ يەلەرىنە گول سوعۋدى بىلاي تۇرماق، قاۋىپتى جاعداي جاساۋدىڭ وزىنە ەشقانداي مۇمكىندىك بەرمەدى. ولار ويىننىڭ ءبىرىنشى مينۋتىنان باستاپ، دوپقا وزدەرى يەلىك ەتىپ،  بىزدىڭ قۇراما كوماندانى جۇگىرتىپ شارشاتۋعا تىرىستى. فيندەر ءبىر-بىرىنە ءدال پاس بەرىپ، الاڭنىڭ بارلىق جەرىندە دوپقا جاقسى تالاسىپ، ارا-تۇرا قاۋىپتى شابۋىلدار ۇيىمداستىرىپ، شاتسكي قورعاعان قاقپانى نىساناعا الىپ وتىردى.

قازاقستان قۇراماسى دا ماتچتىڭ ءبىرىنشى تايمى بىتۋگە ساناۋلى مينۋتتار قالعانعا دەيىن قارسىلاستارىمەن تەڭ ويناۋعا تىرىستى. الايدا، الەم چەمپيوناتىنا قاتىسىپ، نەبىر مىقتى كوماندالارمەن يىق تەڭەستىرىپ ويناعان سۋومي ەلىنىڭ ساڭلاقتارى قورعانىستا ساۋاتتى ويناپ، الاڭ يەلەرىنە قاۋىپتى جاعداي جاساۋدى ويلاۋعا دا ەش مۇمكىندىك بەرمەدى.

ءبىزدىڭ قۇراما فيندەردىڭ شابۋىلىنا تويتارىس بەرە الماي، اقىر سوڭىندا ءوز ايىپدوپ الاڭىندا بولماشى ءبىر قاتەدەن گول جىبەرىپ الدى. فيندەر بولسا، ونداي قاتەلىكتى بوسقا جىبەرمەي، ءبىر-بىرىنە ءدال پاس بەرىپ، دوپتى ءاپ-ساتتە تەمىر تورعا تۋلاتتى. 45 مينۋتتا تەەمۋ پۋككي نىسانانى ءدال كوزدەدى. فينليانديا قۇراماسىندا ەكىنشى دوپتى دا وسى جىگىت سوقتى. ول 48 مينۋتتا ءدۋبلدىڭ اۆتورى اتاندى. ءسويتىپ، وتانداستارىمىز قارسىلاستاردان تاجىريبە جاعىنان دا شەبەرلىك جاعىنان دا جەڭىلىپ، تاعى دا سان سوعىپ قالدى. مۇنىڭ الدىندا كوماندامىز بوسنيا جانە گەرتسوگوۆينا قۇراماسىمەن كەزدەسىپ، ءدال وسىنداي ەسەپپەن ۇتىلعان ەدى. وسى ەكى جەڭىلىس ەلىمىزدىڭ باس كومانداسىنا تۋرنير كەستەسىندەگى جاعدايىن ودان سايىن قيىنداتىپ جىبەردى. ەندى قازاقستان قۇراماسى كەلەسى ماتچىن فرانتسيا كومانداسىمەن وينايدى. ودان كەيىن 2022 جىلعى الەم چەمپيوناتىنىڭ ىرىكتەۋ ءتۋرنيرىنىڭ شىمىلدىرىعىن جابادى. فرانتسيامەن ويىن 13 قاراشا كۇنى بولادى.

داستان كەنجالين،

ءىلياس وماروۆ (فوتو)