«شىققان تەگى قورعالجىننان»: ساپيەۆ قورعالجىنعا اتا-باباسى تۋعان وڭىرگە بارىپ قايتتى

بوكستان وليمپيادا جانە ەكى دۇركىن الەم چەمپيونى سەرىك ساپيەۆ اقمولا وبلىسى قورعالجىن اۋدانىنا اتا-بابالارى تۋعان وڭىرگە بارىپ قايتتى.

اتاقتى بوكسشى قورعالجىن اۋدانىندا العاش رەت وتكىزىلگەن «جىگەر – 2022» وقۋشىلار سپارتاكياداسىنا قاتىستى. ونىڭ اشىلۋ راسىمىندە پارلامەنت ءماجىلىسىنىڭ ەكس-دەپۋتاتى، قورعالجىننىڭ تۋماسى، ۇقك-ءىڭ وتستاۆكاداعى پولكوۆنيگى فايزۋللا قامەنوۆ جەرگىلىكتى زيالى جانە سپورت قاۋىمىنىڭ اتىنان بوكستان 2012 جىلعى وليمپيادا چەمپيونى، «ۆەل باركەر» كۋبوگىنىڭ يەگەرى، ەكى دۇركىن الەم چەمپيونى (2005، 2007)، ازيا ويىندارىنىڭ جەڭىمپازى (2010) سەرىك ساپيەۆكە سالتاناتتى تۇردە قارابايىر تۇلپار مىنگىزدى.

وسى ءىس-شاراعا كازاقستاندىق سپورتشىلار وداعىنىڭ پرەزيدەنتى، بوكستان جاستار اراسىندا الەم بىرىنشىلىگىنىڭ جۇلدەگەرى ازامات قارلىعاشەۆ، وسى جارىستىڭ دەمەۋشىلەرىنىڭ ءبىرى، كاراتە كيكۋشۋنكاي فەدەراتسياسىنىڭ ۆيتسە-پرەزيدەنتى، استاناداعى سپورت مەكتەبىنىڭ ديرەكتورى، قورعالجىن اۋدانىنىڭ ءۇشسارت اۋىلىنىڭ تۋماسى ازامات يماشەۆ، سپورت جاناشىرى، سايىسقا اتسالىسىپ، كومەك قولىن سوزعان، نۇر-سۇلتان قالاسى سپورتتىق ءىس-شارالاردى وتكىزۋ ديرەكتسياسىنىڭ باسشىسى، قورعالجىن اۋدانى كەڭبيدايىق اۋىلىنىڭ تۋماسى باقتيار ماسانوۆ پەن باسقا دا جەرلەس-ازاماتتار قاتىستى.

قورعالجىن ازاماتتارىنىڭ سەرىك جۇماجان ۇلىنا ات مىنگىزگەنى تەگىن ەمەس. ويتكەنى، وليمپيادا چەمپيونىنىڭ تۋعان اتاسى ءداۋىت ساپيەۆ وسى قورعالجىن ايماعىندا تۋىپ-وسكەن. قازىر ونى بىرەۋ بىلسە، بىرەۋ بىلمەيدى. قولدا بار مالىمەتكە قاراعاندا، ول 1901 جىلى بۇرىن قاراعاندى ولبىسىنىڭ قۇرامىنا كىرگەن قورعالجىن اۋدانىنىڭ №3 اۋىلىندا تۋعان. بۇگىندە ول ءۇشسارت اۋىلى دەپ اتالادى. ول  قورعالجىننان 25-30 شاقىرىم جەردە ورنالاسقان.

ءداۋىت ساپيەۆ 1929 جىلعا دەيىن سوۆحوزدا جۇمىس ىستەپ، ودان كەيىن قاراعاندى قالاسىنا بارىپ، كەن ورىندارىنا جۇمىسقا ورنالاسقان.  ونىڭ اتا-اناسى 1909 جىلى قايتىس بولعان دەگەن دەرەك بار.

بۇگىن سەرىك ساپيەۆ باباسىنىڭ قورعالجىن وڭىرىنەن شىققانىن جانە سول جەرگە بارىپ كەلگەنى تۋرالى ءوزىنىڭ Instagram-داعى پاراقشاسىندا دا جازدى.

«جاقىندا اتا-بابامنىڭ تۋعان جەرىنە بارىپ، قورعالجىن اۋدانىندا العاش رەت وتكەن «جىگەر – 2022» وقۋشىلار سپارتاكياداسىنا قاتىستىم.
ءبىزدىڭ قورعالجىن قورىعى وتە ادەمى ەكەن»، — دەدى ول.

داستان كەنجالين