SportPress.kz قازاقستان سپورت جاڭالىقتارى
– ۇلتتىق قۇرامانىڭ الداعى ويىندارعا دايىندىق دەڭگەيى تۋرالى ايتىپ بەرىڭىزشى. بىرنەشە ويىنشى قاتىسا المايتىنى تۋرالى بەلگىلى بولدى.
– ءيا، ول راس. الداعى ويىندارعا قاتىسا المايتىن ويىنشىلارىمىز بار. «استانادان» مۋجيكوۆ، شومكو، موكين كومەكتەسە المايدى. بىزگە جىگىتتەردىڭ دەنساۋلىعى ماڭىزدىراق. سوندىقتان ءوز كلۋبتارىندا ەمدەلەتىن بولادى. ولاردىڭ تەزىرەك جازىلىپ كەتۋىن تىلەيمىز.
– ال سەرگەي مالىيدى امالدىڭ جوقتىعىنان شاقىردىڭىز با؟ قانشا دەگەنمەن، ونىڭ ويىن پراكتيكاسى وزگەلەرىنە قاراعاندا ازداۋ.
– امالدىڭ جوقتىعىنان دەپ ايتۋعا بولماس. ول ۇلتتىق قۇراماعا وسىعان دەيىن بىرنەشە رەت شاقىرتۋ العان، تاجىريبەسى دە جوق ەمەس. راس، قوسالقى قۇرامدا بىرنەشە فۋتبولشىمىز بولعان. بىراق وكىنىشكە قاراي ولار دا جاراقات الىپ قالدى. سونداي-اق، ورتالىق قورعانىستا سارى قاعاز يەلەنگەن ويىنشىلارىمىز بار. سوندىقتان وسىنىڭ ءبارىن جان-جاقتى ەسكەردىك. بۇدان بولەك، گەورگي جۋكوۆتىڭ، باۋىرجان يسلامحاننىڭ قاتىسا المايتىنى بىزگە قيىنداۋ بولىپ تۇر. دەگەنمەن بۇل فۋتبول ەكەنىن ۇمىتپايىق. مۇندا ءبارى بولادى. نەگىزگى قۇرامداعى ويىنشىلاردىڭ ورنىن وزگە دە جىگىتتەر لايىقتى تۇردە باسا الادى. ۇلتتىق قۇراما جەكەلەگەن ويىنشىلاردان ەمەس كوماندادان تۇرادى.
– ىرىكتەۋ كەزەڭى اياقتالىپ قالدى. سىزگە وسى كەزەڭدە كوماندانى جاسارتۋ ىسىنەن بولەك وزگە تاپسىرما بەرىلىپ پە ەدى؟
– ەڭ باستىسى جاستارعا كوبىرەك مۇمكىندىك بەرۋ بولاتىن. جاستار تۋرالى وسىعان دەيىن بىرنەشە رەت ايتقانمىن. جاستار قۇراماسىندا بولاشاعىنان ۇلكەن ءۇمىت كۇتتىرەتىن ويىنشىلار از ەمەس. ولاردى وزىمىزگە شاقىرار ەدىك. بىراق بولگارياعا قارسى ويىن كۇتىپ تۇر. ول جاقتا جوعارى ورىنداردىڭ ءبىرىن يەلەنۋ مۇمكىندىگى بار. قازىر بەس-التى جىگىتتى نازارىمىزدا ۇستاپ وتىرمىز. ولار بولاشاقتا ەل فۋتبولىن ورگە سۇيرەيتىن ويىنشىلاردىڭ ءبىرى بولادى دەپ ۇمىتتەنەمىن.
– ءسىزدىڭ ەڭبەگىڭىزدى قازاقستان فۋتبول فەدەراتسياسى قانداي ولشەمدەرمەن باعالايدى؟
– ول جاعىن بىلمەدىم. بىراق قازىرگى جۇمىسىما ءوزىمنىڭ كوڭىلىم تولمايتىنىن ايتا كەتكىم كەلەدى. تىلشىلەر قاۋىمىنان بۇرىن ءوزىمدى ءوزىم كوبىرەك سىنعا الامىن. ال قازاق فۋتبولىنىڭ بولاشاعى زور. مۇندا نەبىر تالانتتى جاستار ءوسىپ كەلەدى.
