Boks: Azııa chempıonatyn Serik Temirjanov bastap beredi

Búgin Iordanııanyń astanasy Amman qalasynda bokstan Azııa chempıonatynyń ekinshi jarys kúni bastalady. Qazaqstan quramasynan sharshy alańǵa úsh boksshysy shyǵady.

Alǵashqy jarys kúninde Qazaqstan quramasynyń bylǵary qolǵap ıeleri rınge kóterilgen joq. Búgin Astana ýaqytymen saǵat 17.00-de 57 kg deıingi salmaqta Serik Temirjanov pen Ihlas Gylychjanov (Túrkmenistan) qolǵap túıistiredi. Jeńgeni shırek fınalda judyryqtasady. Odan keıin 63,5 kg salmaqta Sanatáli Tóltaev  О́zbekstannyń boksshysy Rýslan Abdýllaevpen kezdesedi.

Al keshki sessııada saǵat 22.00-de  51 kg deıingi salmaqtaǵy álem chempıony Sáken Bıbosynov úndilik Sparsh Kýmarmen kezdesedi.

Erler quramasynyń bas jattyqtyrýshysy Qaırat Sátjanovtyń aıtýynsha, osy dodada boksshylar óz mánerin joǵaltpaı, barlyq salmaqta júldege sońyna deıin talasady.

Bizdiń jigitter – álem boksynyń kóshbasshylary. Alǵashqy aınalymda-aq 48 kg deıingi salmaqta eresekter arasyna endi qosylǵan Sanjar Tashkenbaı daryndy ózbekstandyq sportshymen judyryqtasady. Ne bolsa da, biz óz mánerimizdi joǵaltpaı, barlyq salmaqta sońyna deıin talasýymyz kerek, — dedi ol jerebe qorytyndysynan keıin.

Sol sekildi áıelder quramasynyń bas jattyqtyrýshysy Shámil Safıýllın de jerebege kóńili tolatynyn, qyzdardyń sharshy alańda aıanbaı qalmaıtynyn aıtty.

Jerebege kóńilim tolady. Shynymdy aıtsam, meni Olımpıada baǵdarlamasyna kiretin 66 kg deıingi salmaqta az sportshy kelgeni tańǵaldyrady. Aldaǵy kúnderi Úndistan, Japonııa, Taıpeı qyzdary biz úshin negizgi qarylas bolmaq. Sondaı-aq О́zbekstan da keıingi jyldary qarqynyna-qarqyn qosyp kele jatyr. Qalaı bolsa da biz kez kelgen qarsylasqa jáne básekege daıynbyz, — dedi ol.

Bıylǵy bokstan Azııa chempıonaty 2022 jyldyń eń mańyzdy ári sońǵy jarystarynyń biri. Sary qurlyq dodasynda erler quramasy 13 salmaq dárejesinde, áıelder 12 salmaqta judyryqtasady. Chempıonat 13 qarasha kúni aıaqtalady.

Dastan KENJALIN,

ASTANA