الەم چەمپيوناتى: ەرعالي شامەي التىن مەدالدى جەڭىپ الدى

ازەربايجاننىڭ باكۋ قالاسىندا ءوتىپ جاتقان پارادزيۋدودان الەم چەمپيوناتىندا قازاقستان قورجىنىنا تاعى ءبىر التىن، ەكى قولا جۇلدەمەن تولىقتى.

بۇعان دەيىن ەلىمىزگە العاشقى التىن مەدالدى  48 كگ سالماق دارەجەسىندە ونەر كورسەتكەن اقمارال ناۋاتبەكتىڭ جەڭىپ العانىن حابارلاعان بولاتىنبىز. ودان كەيىن 73 كەلىگە دەيىنگى سالماقتا سىنعا تۇسكەن  ەرعالي شامەي فينالدىق بەلدەسۋدە گەرمانيانىڭ بالۋانى ساسس لەننارتتى 1:0 ۇپايمەن جەڭىپ، ەكىنشى التىن جۇلدەنى يەلەندى.

الەم چەمپيوناتىنىڭ قولا جۇلدەسى دايانا فەدوسوۆا ( -57 كگ) مەن ولجاس ورازالى ۇلى (-73 كگ) بۇيىردى.

پارادزيۋدودان الەم چەمپيوناتى 11 قاراشاعا دەيىن بولادى.  وعان 41 مەملەكەتتەن 270 بالۋان قاتىسسا،  قازاقستان ۇلتتىق قۇراماسىنان 18 سپورتشى ەل نامىسىن قورعاپ جاتىر.

داستان كەنجالين،

استانا