SportPress.kz قازاقستان سپورت جاڭالىقتارى
كاتار قۇراماسى فۋتبولدان الەم چەمپيوناتىنىڭ اشىلۋىندا ەكۆادوردان 0:2 ەسەبىمەن ۇتىلدى.
مۋنديالدىڭ العاشقى ماتچى ءال-حاۋر قالاسىنداعى «ءال-بايت» ستاديونىندا بولدى.
كەزدەسۋدەگى ەكى دوپ تا قاقپاعا ءبىرىنشى تايمدا سوعىلدى.
ەكۆادورلىقتار 3-مينۋتتا ەسەپ اشقان ەدى. بىراق الاڭداعى اربيتر وفسايد بولدى دەگەن ەسەپتەمەي تاستادى.
بۇدان كەيىنگى ءبىرىنشى گول پەنالتيدەن سالىندى. ماتچتىڭ 16-مينۋتىندا وزىمەن بەتپە-بەت شىققان ەكۆادور قۇراماسىنىڭ شابۋىلشىسى ەننەر ۆالەنسيانى كاتارلىق قاقپاشى ءوز ايىپ الاڭىندا ەكى قولىمەن اياعىنان ۇستاپ قۇلاتتى. وسى ءۇشىن بەلگىلەنگەن ون ءبىر مەترلىك ايىپ دوبىن فورۆاردتىڭ ءوزى سوقتى.
ارادا تاعى 15 مينۋت وتكەننەن كەيىن ۆالەنسيا دۋبل جاسادى. بۇل جولى ول قاقپاشى الاڭىنا قاراي الىستان بەرىلگەن دوپقا باسىن توسا قويىپ، ونى توردان ءبىر-اق شىعاردى.
ەكۆادورلىقتار ماتچتىڭ ءبىرىنشى تايمىندا وتە سەنىمدى وينادى. كاتارلىقتار ولاردىڭ قاقپاسىنا قاۋىپ توندىرە المادى.
ويىننىڭ ەكىنشى تايمىندا الاڭداعى قارقىن ءبىرشاما باسىلىپ قالعانداي بولدى. ەكۆادورلىقتار دوپتى ءوز تىزگىندەرىندە ۇستاپ، قارسىلاستارىنىڭ شابۋىل جاساۋلارىنا جول بەرە قويمادى. ءسويتىپ، ولار الاڭ يەلەرىنە ەسەپتى ماتچ سوڭىنا دەيىن وزگەرتۋگە مۇمدىك بەرگەن جوق.
ەندى ەكىنشى تۋردىڭ ويىنىن كاتار 25 قاراشادا سەنەگالمەن وتكىزسە، ەكۆادور سول كۇنى نيدەرلاندپەن الاڭعا شىعادى.
21 قاراشا كۇنى انگليا مەن يران (19:00)، سەنەگال مەن نيدەرلاند (22:00) قۇرامالارى ءوزارا كۇش سىناسادى. ال سول كۇنى تۇندە جاسىل الاڭعا اقش پەن ۋەلس (01:00) كوماندالارى شىعادى.
داستان كەنجالين،
استانا
