قازاق كۇرەسى: قازاقستان تاعى بەس التىن جۇلدە الدى

استانادا ءوتىپ جاتقان قازاق كۇرەسىنەن الەم چەمپيوناتىنىڭ ەكىنشى كۇنى ۇلتتىق قۇرامانىڭ بالۋاندارى بەس التىن جانە ءبىر كۇمىس مەدال جەڭىپ الدى.

«Qazaq kuresi» قاۋىمداستىعىنىڭ حابارلاۋىنشا، چەمپيوندار التى سالماق دارەجەسىندە ونەر كورسەتتى. ولاردىڭ اراسىندا جەڭىس تۇعىرىنان كورىنگەندەردىڭ تورتەۋى – ەرلەر بولسا، ەكى مەدالدى قورجىنعا ايەلدەر قۇراماسىنىڭ وكىلدەرى سالدى.

چەمپيوناتتىڭ ەكىنشى كۇنى بەكحان تولەپوۆ (55 كگ)، نۇر امانشۇقىروۆ (66 كگ)، جۇماجان قوجامبەكوۆ (74 كگ)، راۋزا نۇرماحامەتوۆا (55 كگ) مەن زارينا زاريپوۆا (65 كگ) تۇعىردىڭ بيىك ساتىسىنا كوتەرىلدى. ال 60 كەلى سالماق دارەجەسىندە بوز كىلەمگە شىققان مارات نىعماتۋلاەۆ كۇمىس مەدال ەنشىلەدى.

الەمدىك دودانى 40 ەلدەن 350 بالۋان قاتىسىپ جاتىر. جارىستىڭ العاشقى كۇنى ەل سپورتشىلارى ۇش التىن مەدال جەڭىپ العان ەدى.

داستان كەنجالين،

استانا