سپورتتاعى جىل ۇزدىكتەرى انىقتالدى

استانادا سپورت سالاسىنداعى جىلدىڭ تاڭداۋلى جۇلدەسى – «جەڭىمپاز رۋحى» ۇلتتىق سىيلىعىنىڭ جەڭىمپازدارى انىقتالدى. بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكتسياسى» رەسپۋبليكالىق مەملەكەتتىك قازىنالىق كاسىپورنى حابارلادى.

سالتاناتتى كەشتە مادەنيەت جانە سپورت مينيسترلىگى ۇزدىك سپورتشىلار، جاتتىقتىرۋشىلار، سپورت جۋرناليستەرىن ماراپاتتاپ، جىل بويى اتقارعان ەڭبەگىنە قۇرمەت كورسەتتى. قازىلار القاسى تاڭداعان 14 نوميناتسيا بويىنشا مىنا ازاماتتار ۇزدىك بولىپ تانىلدى:

1) «جىلدىڭ ۇزدىك سپورتشىسى» – ءجاميلا باقبەرگەنوۆا (جازعى سپورت تۇرلەرىنەن) مەن الەكساندر گەرليتس (قىسقى سپورت تۇرلەرىنەن);

2) «جىلدىڭ ۇزدىك جاتتىقتىرۋشىسى» – نۇرسۇلتان تەمىروۆ (جازعى) پەن انتون جدانوۆيچ (قىسقى);

3) «جىلدىڭ ۇزدىك اككرەديتتەلگەن سپورت فەدەراتسياسى» – ۇلتتىق كونكي تەبۋشىلەر فەدەراتسياسى

4) «جىلدىڭ ۇزدىك سپورت مەكەمەسى» – اتىراۋ وبلىسى «مۇگەدەكتەردىڭ سپورت ۇيىمى»;

5) «جىلدىڭ ۇزدىك سپورت ءوڭىرى» – قاراعاندى وبلىسىنىڭ دەنە شىنىقتىرۋ جانە سپورت باسقارماسى;

6) «اۋىلداعى ۇزدىك جاتتىقتىرۋشىسى» – داستان كاناتبەك ۇلى بالابەكوۆ (جەتىسۋ وبلىسى);

7) «دەنە شىنىقتىرۋ جانە سپورت ءبولىمىنىڭ ۇزدىك مامانى» – يرينا نوۆيكوۆا مەن ەلەنا گاليتس (استانا);

8) «جىلدىڭ ۇزدىك بالالار جاتتىقتىرۋشىسى» – سامات ساپيشەۆ (شىمكەنت);

9) «ويىن تۇرلەرى بويىنشا ۇزدىك سپورت كومانداسى» – «قۋانىش» ۆولەيبول كلۋبى (سقو);

10) «اۋىلداعى ۇزدىك دەنە شىنىقتىرۋ جانە سپورت ءبولىمىنىڭ ادىسكەرى» –بەكجان ادامبەكوۆ (تۇركىستان وبلىسى);

11) «جىل جاڭالىعى – ۇزدىك سپورتشى» – ەلەنا رىباكينا;

12) «جىلدىڭ ۇزدىك مەتسەناتى» – قايىربەك سادۋاقاس ۇلى حامزين (سقو);

13) «جاستار مەن جاسوسپىرىمدەر اراسىنداعى ۇزدىك سپورتشى» – الان قۇرمانعاليەۆ (ۇستەل تەننيسى)، ەۆگەني فەدوروۆ (ۆەلوسپورت)، ماريا بروۆكوۆا (كانوەدە ەسكەك ەسۋ);

14) «سەيداحمەت بەردىقۇلوۆ اتىنداعى ۇزدىك سپورت ءجۋرناليسى» نوميناتسياسى – اسلان قاجەنوۆ، عالىم سۇلەيمەن، بەك تولەۋوۆ.

سالتاناتتى كەشتىڭ سوڭىندا مادەنيەت جانە سپورت ۆيتسە-ءمينيسترى سەرىك جاراسباەۆ ءسوز الىپ، جەڭىمپازداردى قۇتتىقتادى.

«اۋەلى بارلىق جۇلدەگەردى قۇتتىقتاعىم كەلەدى. بيىل اتاپ ايتار جەڭىستەرىمىز دە كوپ بولدى. بۇگىن سول ءساتتىڭ جەڭىمپازدارى وسىندا جينالدى. مەملەكەت سپورتى دامىتۋ، سپورتشىلاردى ىنتالاندىرۋ بويىنشا بار جاعدايدى جاساپ جاتىر. ەل سپورتىنا سەرپىن بەرەتىن بىرقاتار زاڭناما دا قابىلداندى. دەسە دە الدا جۇمىس كوپ. كەلەسى جىلى وليمپياداعا دايىندىقتىڭ قىزار شاعى. ءبىزدىڭ قۇرامالار بارىنشا كوپ جولداما يەلەنۋگە بارىن سالماق. ال ماقسات — پاريجدەگى باستى باسەكەدە ءساتتى ونەر كورسەتۋ»، — دەدى ول.