Rybakına álemniń birinshi raketkasyn utty

Tennısten Avstralııanyń ashyq chempıonatynda qazaqstandyq Elena Rybakına polıak Iga Svıontekti jarys jolynan shyǵaryp tastady. 

Polshanyń 21 jastaǵy tennısshisi Iga Svıontek álem reıtıngisinde qazir birinshi nómirli bolsa, Elena Rybakına 25-satyda tur.

«Australian Open» Melbýrndegi «Melbýrn Park Rod Leıver Arena» stadıonynda bolyp jatyr.

Qańtardyń 16-synda bastalǵan ashyq chempıonattyń áıelder týrnırinde ekinshi aptaǵa «Úlken shlem týrnırleriniń» bes birdeı chempıondary – Vıktorııa Azarenko, Elena Ostapenko, Elena Rybakına, Iga Svıontek jáne Barbora Kreıchıkova jetti. Olardyń bári jerebedegi elektiń joǵarǵy jartysynan oryn aldy.

Bulardyń arasynan 1/8 fınaldyq shaıqasqa birinshi bolyp Elena Rybakına men Iga Svıontek shyqty. Kezdesý 1 saǵat 19 mınýtqa sozyldy. Match 6:4, 6:4 esepterimen qazaqstandyq sportshynyń paıdasyna sheshildi. Sońǵy settiń basynda Lena qarsylasynan 0:3 esebimen utylyp turdy. Biraq esesin kóp uzamaı qaıtaryp, aqyrynda alǵa shyqty.

Endi Rybakına shırek fınalda latvııalyq Elena Ostapenkomen kúsh synasady.

Eske sala keteıik, Iga 2022 jyly «Rolan Garros» pen US Open týrnırinde kósh bastasa, Elena Ýımbldonda birinshi bolǵan edi. Alaıda, osy kezde reseılik jáne belarýstik tennısshiler banǵa jiberilýlerine baılanysty reıtıngilik upaılarynan aıyrylyp qalǵandyqtan, Qazaqstan ókili óz reıtıngisine 2000 ball qosa almady. Sóıtip, 25-satyda qalyp qoıdy.

Avstralııanyń ashyq chempıonaty 30 qańtarda óz máresine jetedi.

Dastan KENJALIN,

ASTANA