تيمۋر تۋرلوۆ پرەزيدەنت توقاەۆپەن كەزدەستى

مەملەكەت باسشىسى قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆتى قابىلدادى.

كەزدەسۋدە ەلىمىزدە شاحماتتى دامىتۋ ماسەلەلەرى تالقىلاندى. قاسىم-جومارت توقاەۆقا جۋىردا قازاقستاندا حالىقارالىق شاحمات فەدەراتسياسىمەن (FIDE) بىرلەسىپ ۇيىمداستىرىلعان حالىقارالىق تۋرنيرلەردىڭ قورىتىندىسى جونىندە مالىمەت بەرىلدى.

تيمۋر تۋرلوۆ فەداراتسيانىڭ الداعى كەزەڭگە ارنالعان جوسپارى تۋرالى ايتتى. اتاپ ايتقاندا، فەدەراتسيا ەلىمىزدەگى شاحمات سەكتسيالارىنىڭ سانىن 2 ەسە، ياعني 7 مىڭنان 14 مىڭعا دەيىن ۇلعايتۋدى، شاحماتتى ودان ءارى دارىپتەۋ جۇمىستارىن جالعاستىرۋدى، وسىلايشا زياتكەرلىك ۇلت قالىپتاستىرۋعا ۇلەس قوسۋ جونىندەگى پرەزيدەنت تاپسىرمالارىن ورىنداۋدى كوزدەيدى.

سونداي-اق فەدەراتسيا قازاقستان قۇراماسى كوشباسشىلارىنىڭ الەۋەتىن تانىتۋدى، جاڭا چەمپيونداردى تاربيەلەپ شىعارۋدى ماقسات ەتىپ وتىر. مەملەكەت باسشىسىنا الەم چەمپيونى اتاعى ءۇشىن بيىل 7 ءساۋىر مەن 1 مامىر ارالىعىندا استانادا وتەتىن شاحمات جارىسىنا دايارلىق بارىسى باياندالدى.

قاسىم-جومارت توقاەۆ وتاندىق شاحمات شەبەرلەرىنىڭ حالىقارالىق ارەناداعى جەتىستىكتەرىنە جوعارى باعا بەردى. ونىڭ ايتۋىنشا، ەلىمىزدە الەمنىڭ ۇزدىك شاحماتشىلارىنىڭ قاتىسۋىمەن ءىرى جارىستار ۇيىمداستىرۋ بالالار مەن جاستار اراسىندا وسى سپورت ءتۇرىنىڭ تانىمالدىلىعىن ارتتىرۋعا ىقپال ەتەدى.

دينارا امانتاي،

استانا