حوك رەسەي مەن بەلارۋس سپورتشىلارىن وليمپياداعا جىبەرمەۋگە شەشىم قابىلدادى

حالىقارالىق وليمپيالىق كوميتەت (حوك) تۇپكىلىكتى شەشىم قابىلدادى: رەسەي مەن بەلارۋس سپورتشىلارىنا بۇرىن بەرىلگەن ديسكۆاليفيكاتسيانىڭ كۇشى ساقتالىپ قالدى.

حالىقارالىق وليمپيالىق كوميتەت كوپ تالاس-تارتىس پەن ءسوز سايىسىنان كەيىن رەسەيلىكتەر ءۇشىن دە، بەلورۋستار ءۇشىن دە ديسكۆاليفيكاتسيانى بۇرىنعى كۇشىندە ساقتاپ قالۋعا ۇيعارىم جاسادى.

حالىقارالىق وليمپيالىق كوميتەت ۋكرايناعا قارسى جاريالانباعان سوعىسقا قاتىسۋشى اگرەسسور-مەملەكەتتەردىڭ وكىلدەرى – رەسەيلىك جانە بەلورۋس سپورتشىلارىنان ديسكۆاليفيكاتسيانى الماۋ جونىندە شەشىم قابىلدادى، – دەلىنگەن حوك-تىڭ رەسمي سايتىندا.

قۇجاتتا رف مەن بر اتلەتتەرىنە اتالمىش سانكتسيانىڭ تاپ وسى ەكى ەل باسشىلىعىنىڭ ۋكرايناعا قارسى سوعىس قيمىلدارىن جۇرگىزىپ جاتقانى ءۇشىن سالىنىپ وتىرعانى اتاپ كورسەتىلگەن.

بۇدان باسقا، حوك رەسەي فەدەراتسياسىنىڭ اگرەسسياسى سالدارىنان زارداپ شەگىپ جۇرگەن ۋكراين اتلەتتەرىنە كومەك كورسەتۋ جالعاستىرىلا بەرەتىنىن مالىمدەدى.

وليمپياداعا بويكوت جاريالاۋ جونىندەگى باستامانى العاش پولشا باستادى. ونىڭ 16 اقپان كۇنى ءمالىم بولعان بۇل ۋلتيماتۋمىن ليتۆا، لاتۆيا، ەستونيا، چەحيا مەن سلوۆاكيا قولداپ اكەتتى.

بۇدان كەيىن حالىقارالىق وليمپيالىق كوميتەتتەن رف مەن بەلارۋس سپورتشىلارىن بەيبىتشىلىكتى ناسيحاتتايتىن وليمپيالىق قوزعالىس قاتارىنا قوسپاۋدى 40-قا جۋىق ەل تالاپ ەتىپ، بۇل ۋلتيماتۋم ەسەپكە الىنباعان جاعدايدا وزدەرىنىڭ پاريج وليمپياداسىنا قاتىسۋدان باس تارتاتىندارىن مالىمدەپ، حات جولدادى. قۇجاتقا قول قويعاندار قاتارىندا اۆستريا، اقش، بەلگيا، گەرمانيا، گرەكيا، دانيا، جاڭا زەلانديا، جاپونيا، يرلانديا، يسلانديا، كيپر، كورەيا، لاتۆيا، ليتۆا، ليحتەنشتەين، ليۋكسەمبۋرگ، نيدەرلاند، نورۆەگيا، رۋمىنيا، سلوۆاكيا، سلوۆەنيا، ۇلىبريتانيا، فينليانديا، حورۆاتيا، چەحيا، شۆەتسيا مەن ەستونيا بولدى.

بۇل دەگەنىڭىز – وليمپيالىق قوزعالىستى قۇلاتۋمەن بىردەي ەدى. وسىدان قورىققان توماس باح باستاعان «جىلىجۇرەكتەر» حوك-تىڭ بۇرىن قابىلدانعان شەشىمىن كۇشىندە قالدىرۋ جونىندە ۇيعارىم جاسادى، – دەپ جازدى Politico.

بۇعان دەيىن حالىقارالىق وليمپيالىق كوميتەت، ونىڭ پرەزيدەنتى توماس باح رەسەيلىكتەر مەن بەلورۋستاردى وليمپياداعا قايتا ورالتۋعا قارسى ەمەس ەكەندەرىن بىرنەشە رەت مالىمدەگەن بولاتىن. سوندا ولاردىڭ العا تارتاتىن ءۋاجى – اتالعان ەلدەر سپورتشىلارىنىڭ ءوز ەلدەرى جالاۋلارىنسىز جانە ءانۇراندارىنسىز بەيتاراپ اتلەتتەر قاتارىندا قاتىسۋلارىنا مۇمكىندىك جاسالادى دەلىنگەن. بۇعان ادامزاتتىڭ اقىل-پاراساتتى جوعالتا قويماعان ايتۋلى وكىلدەرى بىردەن ۇدەرە قارسى كوتەرىلدى. ولار حوك-پەن ارادا الدەنەشە رەت قاراما-قايشى پىكىرتالاسقا بارىپ، ءوز ۇستانىمدارىن نىعىزداي ءتۇستى.

مۇنىڭ سوڭى الەمنىڭ سپورت دەرجاۆالارىنىڭ بىرقاتارىنىڭ 2024 جىلى پاريجدە وتكەلى تۇرعان وليمپيالىق ويىندارعا بويكوت جاريالاۋلارىنا اپارىپ سوقتىرا جازدادى.

داستان كەنجالين،

استانا