ساپيەۆپەن ۇستاسقان بالۋان كوللەدجدەن شىعارىلدى – بوكسشى ساتىبالدينوۆا

Batyrball تۋرنيرىندە بوكستان وليمپيادا چەمپيونى سەرىك ساپيەۆپەن ۇستاسىپ قالعان بالۋان زەليمحان مۋسيحانوۆ كوللەدجدەن شىعارىلعان. بۇل تۋرالى بوكسشى ايدا ساتىبالدينوۆا Instagram-پاراقشاسىندا ايتتى.

ونىڭ ايتۋىنشا، بالۋاننىڭ سپورت كوللەدجىن بىتىرۋىنە ەكى اي قالعان. سونىمەن بىرگە ءالى راستالماعان اقپارات بويىنشا، مۋسيحانوۆتىڭ تۋىستارى دا جۇمىستان قۋىلعان.

وليمپيادا چەمپيونى مەن زەليمحان مۋسيحانوۆتىڭ توبەلەسىن ءبارىمىز كوردىك. جىگىتتەر قول الىسىپ، جانجال سونىمەن ءبىتتى دەپ ويلاپ ەدىك. الايدا ولاي ەمەس ەكەن. وسى وقيعادان كەيىن نە بولدى دەيسىزدەر عوي. زەليمحان ءوزى وقىپ جۇرگەن سپورت كوللەدجىنەن شىعارىلدى. ونىڭ اعاسى جۇمىستان قۋىلعان. اتا-اناسى دا جۇمىستان قۋىلعان دەگەن دەرەك بار. بىراق انىق-قانىعىن بىلمەيمىن. ارتىنان الەكساندر گولتسمان (مۋسيحانوۆتىڭ جاتتىقتىرۋشىسى، — رەد.) وسى ىسكە ارالاسىپ، زەليمحاندى قايتادان وقۋعا الدىرۋعا تىرىسادى. سەبەبى، بالۋاندى وسى وقيعاعا بولا وقۋدان شىعارۋ قاتە. امالىن تاۋىپ ونى قايتادان الدىردى، — دەدى ساتىبالدينوۆا.

Batyrball ويىنى (سپورتتىڭ كۇرەس پەن باسكەتبولدىڭ ارالاس ءتۇرى، — رەد.) كەزىندە سەرىك ساپيەۆ بالۋان زەليمحان مۋسيحانوۆپەن ۇستاسىپ قالعان. بالۋان ساپيەۆكە قارسى كۇرەس ءادىسىن قولدانعان ەدى. بۇل بوكسشىعا ۇناماعان. سودان كەيىن ەكەۋىنىڭ اراسىندا توبەلەس بولا جازداعان. كەيىن كيىم اۋىستىراتىن بولمەدە ەكەۋى قول الىسىپ، ءبىر-بىرىنەن كەشىرىم سۇراعان. زەليمحان مۋسيحانوۆ پەن ونىڭ جاتتىقتىرۋشىسى الەكساندر گولتسمان كوپشىلىكتەن كەشىرىم سۇراپ، بەينەجازبا جاريالاعان.

داستان كەنجالين،

استانا