«سىزبەن ءبىر كومناتادا جاتايىنشى دەدى» — ەرماحان ىبىرايىموۆتىڭ ساتتارحانوۆ تۋرالى سىرى

سيدنەي وليمپياداسىنىڭ چەمپيونى ەرماحان ىبىرايىموۆ ءوزىنىڭ كوماندالاسى ءارى ءىنىسى بولىپ كەتكەن بەكزات ساتتارحانوۆ تۋرالى ەستەلىگىن ايتتى. بۇل تۋرالى halyq-uni.kz حابارلادى.

ەرماحان ىبىرايىموۆتىڭ ايتۋىنشا، ول بەكزات سياقتى ەڭبەكقور بوكسشىنى ەشقاشان كەزدەستىرمەگەن.

قازىرگى جاستارمەن كەزدەسكەن كەزدە بارىنە بەكزات ساتتارحانوۆتى ۇلگى قىلىپ ايتامىن. 20 جاسىندا وليمپيادا چەمپيونى بولۋ ەكىنىڭ ءبىرىنىڭ، ميلليوننىڭ ءبىرىنىڭ قولىنان كەلە بەرمەيتىن ءىس. بەكزات وليمپيادالىق قۇراماعا قالاي كەلدى، ول ءبىر ساعاتىن، ءبىر سەكۋندىن دا بوس جىبەرگەن جوق. «ۇيرەن دە جيرەن» دەيدى. «ەرماحان اعا، سىزبەن ءبىر كومناتادا جاتايىنشى. اناۋ قالاي بوكستاسادى؟ مىناۋ قالاي جۇدىرىقتاسادى»، — دەپ سۇراعىن جاۋدىراتىن. مەن ونىڭ سۇراقتارىنا جاۋاپ بەرۋدەن شارشاپ: «بەكزات، اينالايىن، بۇگىنگە بوكستى قويا تۇرايىقشى. ەرتەڭ جالعاستىرامىز»، — دەپ ايتاتىنمىن.

ول تەوريا، پراكتيكا جۇزىندە بوكستى ۇيرەنە بەردى، ۇيرەنە بەردى. مىنە، مەنىڭ جاتتىقتىرۋشىم تۇرسىنعالي ەدىلوۆ تە ونى ەڭبەكقور دەپ ايتىپ جاتىر. ءيا، ەڭبەكقور. بۇرىنعى قازاق ەرتەگىلەرىندە بالا ساعات سايىن، مينۋت سايىن وسەتىن ەدى عوي. سول سياقتى، بەكزات وليمپيادانىڭ ءاربىر جەكپە-جەگىندە وسە ءتۇستى. ونىڭ فينالداعى قارسىلاسى ريكاردو حۋارەس ەش جەڭىلمەگەن، الەم چەمپيونى اتانعان ەڭ مىقتى بوكسشى بولاتىن. ونى جەڭەدى دەپ ەشكىم ويلاعان جوق. بىراق بەكزات ونىڭ دا ايلاسىن تاپتى، — دەدى ەرماحان ىبىرايىموۆ.

سيدنەي وليمپياداسىنىڭ چەمپيونى بەكزات ساتتارحانوۆ ءتىرى بولسا، 4 ءساۋىر كۇنى 43 جاسقا تولار ەدى. ول 2000 جىلدىڭ 31 جەلتوقسانىندا جول اپاتىنان قازا تاپتى.