«Sizben bir komnatada jataıynshy dedi» — Ermahan Ybyraıymovtyń Sattarhanov týraly syry

Sıdneı Olımpıadasynyń chempıony Ermahan Ybyraıymov óziniń komandalasy ári inisi bolyp ketken Bekzat Sattarhanov týraly esteligin aıtty. Bul týraly halyq-uni.kz habarlady.

Ermahan Ybyraıymovtyń aıtýynsha, ol Bekzat sııaqty eńbekqor boksshyny eshqashan kezdestirmegen.

Qazirgi jastarmen kezdesken kezde bárine Bekzat Sattarhanovty úlgi qylyp aıtamyn. 20 jasynda Olımpıada chempıony bolý ekiniń biriniń, mıllıonnyń biriniń qolynan kele bermeıtin is. Bekzat olımpıadalyq quramaǵa qalaı keldi, ol bir saǵatyn, bir sekýndyn da bos jibergen joq. «Úıren de jıren» deıdi. «Ermahan aǵa, sizben bir komnatada jataıynshy. Anaý qalaı bokstasady? Mynaý qalaı judyryqtasady», — dep suraǵyn jaýdyratyn. Men onyń suraqtaryna jaýap berýden sharshap: «Bekzat, aınalaıyn, búginge boksty qoıa turaıyqshy. Erteń jalǵastyramyz», — dep aıtatynmyn.

Ol teorııa, praktıka júzinde boksty úırene berdi, úırene berdi. Mine, meniń jattyqtyrýshym Tursynǵalı Edilov te ony eńbekqor dep aıtyp jatyr. Iá, eńbekqor. Burynǵy qazaq ertegilerinde bala saǵat saıyn, mınýt saıyn ósetin edi ǵoı. Sol sııaqty, Bekzat Olımpıadanyń árbir jekpe-jeginde óse tústi. Onyń fınaldaǵy qarsylasy Rıkardo Hýares esh jeńilmegen, álem chempıony atanǵan eń myqty boksshy bolatyn. Ony jeńedi dep eshkim oılaǵan joq. Biraq Bekzat onyń da aılasyn tapty, — dedi Ermahan Ybyraıymov.

Sıdneı Olımpıadasynyń chempıony Bekzat Sattarhanov tiri bolsa, 4 sáýir kúni 43 jasqa tolar edi. Ol 2000 jyldyń 31 jeltoqsanynda jol apatynan qaza tapty.