پرەزيدەنت رىباكيناعا باعالى سىيلىق بەردى

مەملەكەت باسشىسى قاسىم-جومارت توقاەۆ تەننيسشى ەلەنا رىباكينامەن كەزدەستى.

پرەزيدەنت Australian Open، ينديان-ۋەللس جانە مايامي تۋرنيرلەرىندە كەرەمەت ونەر كورسەتكەن ەلەنا رىباكينانى قۇتتىقتاپ، شەبەرلىگى مەن جەڭىسكە دەگەن ەرىك-جىگەرى ءۇشىن ريزاشىلىعىن ءبىلدىردى.

مەملەكەت باسشىسى قازاقستان تەننيسشىلەرىنىڭ جەتىستىگى وسكەلەڭ ۇرپاق اراسىندا وسى سپورت ءتۇرىنىڭ تانىمالدىلىعىن ارتتىرۋعا سەپتىگىن تيگىزەتىنىن اتاپ ءوتتى. ەلەنا رىباكينا جەڭىس تۇعىرىنان كورىنگەن ساتتەرىندە قولداۋ بىلدىرگەنى جانە جۇرەكجاردى قۇتتىقتاۋلارىن جولداعانى ءۇشىن پرەزيدەنتكە العىس ايتتى. داڭقتى تەننيسشى الداعى ۋاقىتتا دا بەدەلدى حالىقارالىق جارىستاردا ءساتتى ونەر كورسەتۋگە بار كۇش-جىگەرىن جۇمسايتىنىن جەتكىزدى.

مەملەكەت باسشىسى قاسىم-جومارت توقاەۆ قازىر ەلىمىزدە 30 مىڭنان اسا ادام تەننيسپەن اينالىساتىنىن ايتتى.

ونىڭ 10 مىڭنان استامى – 10 جاسقا دەيىنگى بالالار. وسى سپورت تۇرىنە بۇقارالىق سيپات بەرۋ ماقساتىندا ەلىمىزدىڭ 17 ايماعىندا تەننيس كورتتارى سالىندى. سونداي-اق Baby tennis، «10 جاسقا دەيىنگى تەننيس» سەكىلدى جوبالار تابىستى جۇزەگە اسىرىلىپ جاتىر، — دەدى پرەزيدەنت.

14-15 ساۋىردە استانادا العاش رەت بيللي دجين كينگ كۋبوگىنىڭ ىرىكتەۋ ماتچى وتەدى. تەننيستەن قازاقستاننىڭ ايەلدەر قۇراماسى پولشا كومانداسىنا قارسى وينايدى. بۇل كەزدەسۋدىڭ جەڭىمپازى الەم چەمپيوناتىنا جولداما الادى.

مەملەكەت باسشىسى حالىقارالىق دەڭگەيدەگى مۇنداي ءىس-شارالاردى ۇيىمداستىرۋ ەلىمىزدەگى تەننيستىڭ دامۋ دەڭگەيىن ارتتىرۋعا تىڭ سەرپىن بەرەتىنىن ايتتى. سونداي-اق پاريجدە وتەتىن جازعى وليمپيالىقويىندارىنا ليتسەنزيا ۇتىپ العان تەننيسشىلەرىمىزگە ساتتىلىك تىلەدى.

كەزدەسۋدە پرەزيدەنت رىباكيناعا ساعات پەن ورامال سىيلادى. ال تەننيسشى مەملەكەت باسشىسىنا Wimbledon-2022 كىتابىن سىيعا تارتتى.

كىتاپتىڭ العاشقى بەتىنە تەننيسشى «قاسىم-جومارت كەمەل ۇلى توقاەۆقا ەلەنا رىباكينادان. استانا. 13.04.2023» دەپ قالاممەن جازدى.

Wimbledon-2022 اۆتورلارى – Paul Newman، Alix Ramsay.

وسىدان كەيىن ەلەنا رىباكينا پرەزيدەنتتىڭ قابىلداۋىنان كەيىنگى بريفينگىدە جانكۇيەرلەرىن بيللي دجين كينگ كۋبوگىنىڭ ىرىكتەۋ ماتچىنا شاقىردى.

بۇگىن مەملەكەت باسشىسىمەن كەزدەسۋدە بولدىم. ارينە، تاڭەرتەڭ وتە قوبالجۋلى ەدىم. دەگەنمەن، جالپى ءبارى دە جاقسى ءوتتى. ءوزىمنىڭ الداعى جوسپارلارىممەن، تۋرنيرلەر تۋرالى اقپاراتپەن ءبولىستىم. ەرتەڭ قازاقستاندا، وسى استانادا ونەر كورسەتەمىز. بارشاڭىزدى كورگەنىمە قۋانىشتى بولامىن. ارينە، جاقسى ونەر كورسەتىپ، جەڭىسكە جەتەمىن دەپ ۇمىتتەنەمىن. مۇنان كەيىن دە بۇكىل كوماندامىزبەن بىرگە جارقىن جەڭىستەرىمىزبەن قۋانتا بەرەمىز»، — دەدى ەلەنا رىباكينا

ودان ءارى الەمنىڭ جەتىنشى، قازاقستاننىڭ ءبىرىنشى راكەتكاسى ەلەنا رىباكينا قازاقستان مەن پولشا كوماندالارىنىڭ ماتچى الدىنداعى جەرەبە تارتۋ راسىمىنە قاتىستى.

داستان كەنجالين،

استانا