تەننيستەن قازاقستان قۇراماسى پولشامەن ماتچتا العا شىقتى

استاناداعى ۇلتتىق تەننيس ورتالىعىندا تەننيستەن بيللي دجين كينگ كۋبوگىنىڭ (كوماندالىق الەم چەمپيوناتى) ىرىكتەۋ كەزەڭى اياسىندا قازاقستان مەن پولشا اراسىنداعى ماتچ بولدى.

كورتقا العاشقى بولىپ قازاقستاننان الەمنىڭ 45-راكەتكاسى يۋليا پۋتينتسەۆا مەن پولشا قۇراماسىنان دۇنيەجۇزىلىك رەيتينگتە 19-ورىندا تۇرعان ماگدا لينەتت شىقتى.

وسىعان دەيىن قارسىلاستار ءوزارا جەتى رەت كەزدەسىپ، سونىڭ بەسەۋىندە ماگدا لينەتت جەڭىسكە جەتكەن ەدى.

ءبىرىنشى پارتيادا پولياك سپورتشىسى 4:0 ەسەبىمەن العا شىقتى. سودان كەيىن عانا يۋليا پۋتينتسەۆا ەسەپتى قىسقارتتى. ەسەپ – 2:4. ماگدا لينەتت ەسەپ 5:2 بولىپ، سەتكە دوپ بەرگەندە، ءوز مۇمكىندىگىن پايدالانا المادى. بۇدان كەيىن پۋتينتسەۆا ەسەپتى 7:5-كە جەتكىزدى.

پۋتينتسەۆا قاتارىنان جەتى گەيمدى جەڭىپ، ەكىنشى سەتتى دە ءساتتى باستادى. ەسەپ – 2:0. سودان كەيىن ول تاعى ءبىر برەيك جاساپ، ەسەپتى 4:1-گە جەتكىزگەنمەن، لينەتت سول بويدا ەسەپتى قايتا قىسقارتتى. دەگەنمەن پۋتينتسەۆا باسەكەنى تاعى ءبىر برەيكپەن تۇيىندەدى. ەسەپ – 6:3. وسىلايشا، قازاقستان 1:0 ەسەبىمەن العا شىقتى.

ودان كەيىن قازاقستاننىڭ جەكەلەگەن سىنداعى ءبىرىنشى، الەمنىڭ جەتىنشى راكەتكاسى ەلەنا رىباكينا مەن رەيتينگتە 253-ساتىدا تۇرعان ۆەرونيكا فالكوۆسكا كەزدەستى. بۇل ويىندا رىباكينا قارسىلاسىن 6:3، 6:4 ەسەبىمەن ۇتتى.

قازاقستان ەكى ويىننىڭ ناتيجەسىندە 2:0 ەسەبىمەن العا شىقتى.

داستان كەنجالين،

استانا