«ارلاندار» فۋتبول كلۋبى پورتۋگاليادا جەتىستىككە جەتتى (فوتو، ۆيدەو)

«ارلاندار» فۋتبول كلۋبى ءوز قارجىلىق ەسەبىنەن قازاقستان فۋتبولىن دامىتۋدا وتە كوپ ينۆەستيتسيا سالدى. سونىڭ ءبىرى — پورتۋگاليا جوباسى. سەبەبى، فۋتبولدىڭ فۋندامەنتى بالالار فۋتبولى بولعاندىقتان، ال بالالار فۋتبولىندا الەمدىك ۇشتىككە كىرەتىن پورتۋگاليانىڭ فۋتبول اكادەميالارىندا قازاقستان بالالارىن دايىنداۋ كەرەك بولدى.

بىلتىر «ارلاندار» فۋتبول كلۋبىنا تالانتتى بالالار جينالدى

2022 جىلى «ارلاندار» فۋتبول كلۋبى ءوز قارجىلىق ەسەبىنەن قازاقستان بويىنشا فۋتبولدان ىرىكتەۋلەر جاساپ، تالانتتى بالالاردى جينادى. استانادا، شىمكەنتتە وقۋ-جاتتىعۋ جيىندارىن وتكىزىپ، پورتۋگالياعا دايىندىقتارىن پىسىقتادى.

قازاقستان بويىنشا ىرىكتەۋلەردەن ءوتىپ، كلۋبتىڭ ىشكى تارتىپتەرى مەن ەرەجەلەرىنە سايكەس كەلەدى دەگەن 12 بالانى 1-9 ءساۋىر ارالىعىندا پورتۋگالياعا جولدادى. العا ەكى ماقسات قويىلعان ەدى.

ونىڭ ءبىرىنشىسى، پورتۋ ايماعىنداعى حالىقارالىق «بيسپورتس» فۋتبول اكادەمياسىنا وقۋعا ءتۇسۋ ءۇشىن بايقاۋلار مەن ەمتيحاندارىنا قاتىسۋ.

ەكىنشىسى، پورتۋگاليانىڭ پونتا-دەلگادا قالاسىندا وتەتىن XV حالىقارالىق ازورەش تۋرنيرىنە قاتىسۋ.

كوماندامىز توگىلگەن ماڭداي تەردى جەرگە تاستاماي، بەس رەت جەڭىسكە جەتتى

العا قويىلعان ەكى ماقسات تا تولىعىمەن ورىندالدى.

«بيسپورت» حالىقارالىق اكادەمياسىنىڭ بايقاۋلارى مەن ەمتيحانى كەزىندە جاتاتىن ورنى مەن تاماعىن اكادەميانىڭ ءوزى تولەدى. ياعني، اكادەميانىڭ كامپۋسىندا بالالارىمىز تەگىن جاتتى. بۇل اكادەميا شىن مانىندە تالانتتى بالالار ىزدەپ جاتقانىن، بالالارعا ۇسىنىپ وتىرعان تەگىن قىزمەتتەرىنەن بايقاۋعا بولادى. بايقاۋ وتكىزۋ ءۇشىن وتە كولەمدى قارجى كەتەدى. ودان بولەك، پاسحا كانيكۋلى كەزىندە دەمالىستا جۇرگەن بارلىق مامانداردى شاقىرۋ، ول دا ءبىر ماسەلە. سوعان قاراماستان تىكەلەي ترانسلياتسيا كەزىندە جۋرناليستەردى تارتىپ، كەمىندە 10 شاقتى ماماندار بالالاردى كورۋ ءۇشىن جۇمىس باسىندا ءجۇردى. بايقاۋدىڭ سوڭعى قادامى رەتىندە «حەللوۋ كاپ» ءتۋرنيرىن ۇيىمداستىردى. بالالارىمىز وسىنداي اۋقىمدى ، ءتۋرنيردىڭ كۋبوگىن ۇتىپ الدى. بۇل بايقاۋدىڭ كوممەرتسيالىق ماقساتتا ەمەس ەكەنىن وسىدان اق بايقاۋعا بولادى.

ودان كەيىن پونتا-دەلگادا قالاسىندا وتكەن حالىقارالىق جارىسقا قاتىستى. جالپى، بۇل جارىستىڭ دەڭگەيىن، الەمدىك ماسشتابتاعى يتاليانىڭ «پارما»، پورتۋگاليانىڭ «سپورتينگ»، افريكا قۇرلىعىنان «ماراكانا»، لاتىن امەريكادان «سان كارلوس» سەكىلدى كلۋبتارىنان قاتىسقان كوماندالارعا قاراپ بىلۋگە بولادى. 10 ەلدەن مىقتى دەگەن 24 كوماندا قاتىستى. كوماندامىز جەتى رەت ويناپ، ەكى رەت جەڭىلىسە دە، بەس رەت جەڭىسكە جەتتى. ناتيجەسىندە 24 كوماندا ىشىنەن جەتىنشى ورىن الدى.

بۇل تۋرنيردە بالالارىمىز تەڭدەسسىز تاجىريبەلەر جينادى. الاڭعا شىعۋ تارتىبىنەن باستاپ، ويىن بىتكەننەن كەيىنگى تارتىپتەرى مەن ەرەجەلەرىن، سونداي اق الەمدىك دەڭگەيدەگى جوعارى فۋتبول مادەنيەتىن ۇيرەنىپ كەلدى.

وسى اتالعان بايقاۋلار مەن تۋرنيرلەر تۋرالى اقپاراتتار بارىنشا اشىق بولدى. اتا-انالارى مەن تۋىستارى تىكەلەي ەفيردەن ويىندارىن كوردى. ماتچتىڭ ۆيدەولارى «بيسپورت» فۋتبول اكادەمياسى مەن XV حالىقارالىق ازورەش ءتۋرنيرىنىڭ You tube كانالدارى مەن Facebook پاراقشالارىنان قايتا كورۋگە بولادى. بارلىق اقپاراتتار ينتەرنەتتە ساقتاۋلى. بارلىعى اشىق، ايقىن ءوتتى.

بالالاردىڭ جەتىستىگى باعالانسا دەگەن تىلەك بار 

قازاقستان فۋتبولىنىڭ ايانىشتى جاعدايى تۋرالى بىلمەيتىندەر، بالالارىمىزدىڭ بۇل جەتىستىگىن باعالامايدى. ول تۇسىنىكتى. سوندىقتان قىسقاشا اقپارات بەرەيىن: جالپى، قازاقستاننىڭ بالالارى ەشقانداي ستاندارتقا ساي دايىندالمايدى. دايىندالعان ەمەس. ورتاق مەتوديكا جوق. قاي باعىتتا داميمىز، قالاي داميمىز دەگەن سۇراقتارعا جاۋاپ جوق. مىسالى، پورتۋگاليادا ءار جاستاعى بالالاردىڭ فۋتبول الاڭدارىنىڭ ولشەمىنە ساي الاڭدا وينايدى. بالالار وسكەن سايىن الاڭى دا ءوسىپ وتىرادى. ال بىزدە، تابىلعان الاڭعا ساي فۋتبولشىلارىمىزدىڭ سانىن انىقتاپ دايىندايمىز. ىشكى دەتالدارىن ايتپاي-اق، قاراپايىم الاڭ ماسەلەسىن ايتايىن. مىسالى، ستاندارتقا ساي ناتۋرالدى گازوندا ومىردە ويناماعان كەشەگى بارعان بالالارىمىز، العاش رەت پورتۋگاليادا تالاپقا ساي تابيعي گازوندا وينادى. كوبىسى ستاندارتقا ساي ەمەس جاساندى گازوندا ويناعان، ءتىپتى فۋتزالدىڭ پاركەتىنەن باسقا زال كورمەگەن بالالار دا بولدى. ال فۋتزال دەگەن ءتىپتى باسقا سپورت ءتۇرى. وسى سەكىلدى تولىپ جاتقان پروبلەمالاردى ايتار بولساق، توم-توم كىتاپ بولادى. سوندىقتان، ەشقانداي جاعدايى جوق، ستاندارتقا ساي ەشقانداي فۋتبول جاتتىعۋىن كورمەگەن بالالاردان ۇلكەن جەتىستىك كۇتۋ دۇرىس ەمەس. سول ءۇشىن دە 30 جىل بويى قازاقستان الەم ساحناسىنا ءبىر فۋتبولشى شىعارا المادى. سەبەبى، ەگىلمەگەن ەگىننەن جەمىس كۇتۋ — اقىماقتىق. سول ءۇشىن دە ءبىز الدىمىزعا، پورتۋگاليادا فۋتبولشىلار دايىنداۋدى ماقسات ەتىپ قويدىق.

جالپى، پورتۋگاليا ءىس-ساپارى تۋرالى پىكىرىمىز وتە جاقسى، جوعارى دەڭگەيدە ءوتتى. كوڭىلگە مەدەۋ بولارلىعى، بۇل حالىقارالىق تۋرنيرگە قازاقستاننان العاش رەت كوماندا قاتىسىپ وتىرعاندىقتان، تۋلاردىڭ اراسىنا قازاقستان تۋى ارنايى تىگىلدى. ءبىز ۇلتتىق قۇراما بولماساق تا، بىزگە دەگەن قۇرمەتى رەتىندە قازاقستاننىڭ ءانۇرانى وينالدى. بالالارىمىز جۇلدەلى ورىن الماسا دا پورتۋگال حالقىنىڭ جۇرەگىنەن ورىن الدى. ونى تريبۋناداعى حالىقتىڭ ىستىق ىقىلاسىنا قالاي بولەنگەنىن ۆيدەولاردان كورۋگە بولادى. ارى قاراي جوسپارىمىز بار. سول بويىنشا جۇمىستارىمىزدى جالعاستىرامىز.

 

قۇرمەتپەن،

«ارلاندار» فۋتبول كلۋبىنىڭ ديرەكتورى فازىلبەك ءابساتتار،

استانا