الاننا بەرىكقىزى مەن ءامينا قايىربەكوۆا شاحماتتان الەم چەمپيونى اتاندى

گرەكيانىڭ رودوس قالاسىندا مەكتەپ وقۋشىلارى اراسىندا شاحماتتان الەم چەمپيوناتى اياقتالدى. مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، 14-22 ءساۋىر ارالىعىندا وتكەن شاحمات دوداسىنا 7-17 جاس ارالىعىنداعى 500-دەن اسا وقۋشى قاتىستى.

بۇل جارىستا قازاقستان قۇراماسى جۇلدە سانى جاعىنان ءبىرىنشى ورىن (2 التىن، 2 كۇمىس، 5 قولا) الدى. G09، ياعني 9 جاسقا دەيىنگى ويىنشىلار اراسىندا كلاسسيكالىق شاحماتتان الاننا بەرىكقىزى مەن ءامينا قايىربەكوۆا چەمپيون اتاندى. الاننا بەرىكقىزى شۆەيتساريالىق جۇيە بويىنشا 9 پارتيانىڭ سەگىزىندە جەڭىسكە جەتتى. ول شەشۋشى ماتچتا نەگىزگى قارسىلاسى – موڭعوليالىق تسەلمۋن يدەردەن (8 ۇپاي) باسىم ءتۇستى. جالپى، بۇل جاس ساناتىندا 41 ويىنشى سىنعا ءتۇستى. وسى تۇستا الاننا ءبىر جارىم جىلدا 4-رازريادتان الەم چەمپيونى اتىعىنا دەيىن جەتىپ وتىر. وسى ناتيجەسىنىڭ ارقاسىندا قازىر الاننا بەرىكقىزى G09 بويىنشا FIDE رەيتينگىندە ءبىرىنشى ورىنعا كوتەرىلدى.

ءامينا قايىربەكوۆا 17 جاسقا دەيىنگى ساناتتا 8 كەزدەسۋدى ۇتىپ، تۇركيالىق زەينەپ ءچيفتيندى (7،5 ۇپاي) ارتتا قالدىردى. ۇزدىك ۇشتىكتى قارسىلاستارىن 6 رەت ۇتىپ، ءبىر رەت تەڭ تۇسكەن تاعى ءبىر تۇركيالىق ەليفناز اكات (6،5 ۇپاي) تۇيىندەدى.

توپ جارعان الاننا بەرىكقىزىنا باس جۇلدەنى بەلگىلى شاحماتشى جان-ميشەل راپەر، ال ءامينا قايىربەكوۆاعا رودوس قالاسى گۋبەرناتورىنىڭ ورىنباسارى كالليستوس دياكوگەورگيۋ تابىس ەتتى.

كۇمىس جۇلدەنى ءنۇرالى نۋرشين (U07 جاس ساناتى، 7،5 ۇپاي) مەن ايسۇلتان بيساليەۆ (U09 جاس ساناتى، 7) يەلەندى.

قولا جۇلدەنى ريزات ۇلان (U07 جاس ساناتى، 7 بالل)، ءالىمجان جاۋىنباي (U09 جاس ساناتى، 7 ۇپاي)، دانيس قۋاندىق ۇلى (U11 جاس ساناتى، 6،5)، ەدگار مامەدوۆ (U13 جاس ساناتى، 7) پەن  داليا دياسقىزى (G11 جاس ساناتى، 6،5) الدى.

جۇلدە سانى جاعىنان ەكىنشى ورىنعا تۇركيا قۇراماسى (3 التىن، 2 كۇمىس، 2 قولا) جايعاسسا، ءۇشىنشى ورىندى موڭعوليا كومانداسى (2 التىن، 3 كۇمىس، 1 قولا) يەلەندى.

داستان كەنجالين،

استانا