الەم چەمپيوناتىنىڭ  توعىزىنشى كۇنى: بەس جەكپە-جەك، ءتورت جەڭىس

تاشكەنتتە ءوتىپ جاتقان بوكستان الەم چەمپيوناتىنىڭ توعىزىنشى كۇنى قازاقستاننىڭ بەس بوكسشىسى رينگكە شىعىپ، ولاردىڭ تورتەۋى جەڭىسكە جەتتى. بۇل تۋرالى rast.kz حابارلادى.

بۇگىن چەمپيوناتتىڭ توعىزىنشى كۇنىندە شارشى الاڭعا 51، 54، 67، 71، 75، 80 كەلىگە دەيىنگى سالماقتارداعى بوكسشىلار كوتەرىلىپ، 1/8 فينالدىق تەكەتىرەستەرگە قاتىستى.

وسى كۇنى بىزدەن كۇندىزگى سەسسيادا 71 كەلىگە دەيىنگى سالماقتاعى كوماندا كاپيتانى اسلانبەك شىمبەرگەنوۆ يزرايلدىك ميروسلاۆ كاپۋلەرمەن، 80 كەلىگە دەيىنگى سالماقتاعى نۇربەك ورالباي تۇرىك كاان ايكۋتسىنمەن كەزدەسىپ، ەكەۋى دە قارسىلاستارىنان 5:0 ەسەبىمەن باسىم ءتۇستى. اسلانبەك باسەكەلەسىن ءۇشىنشى راۋندتا ءبىر رەت نوكداۋنعا دا ءتۇسىردى.

كەشكى سەسسيادا دا ءبىزدىڭ ەكى بوكسشىمىز قارسىلاستارىنان 5:0 ەسەبىمەن باسىم ءتۇستى. جارىس جولىن 54 كەلىگە دەيىنگى سالماقتاعى ماحمۇد سابىرحان مەن ۇندىستاندىق ساچين ساچين اشتى. شايقاس بارىسىندا ماحمۇد ءبىرىنشى راۋندتا جەڭىپ شىققانىمەن، ەكىنشى راۋندتا ينيتسياتيۆانى قارسىلاسىنا بەرىپ قويدى. دەگەنمەن، سوڭعى راۋندتى وتە جوعارى قارقىنمەن وتكىزىپ، جەڭىستىڭ وزىنىكى ەكەنىنە ەشكىمنىڭ كۇمانىن كەلتىرمەدى. سودان كەيىن 67 كەلىگە دەيىنگى سالماقتاعى دۋلات بەكباۋوۆ كەلەسى ءبىر ۇندىستاندىق اكاش اكاشپەن قولعاپ ءتۇيىستىردى. ول ءبىرىنشى راۋندتا ۇتىلىپ تۇردى. بىراق كەلەسى راۋندتاردا سول ولقىلىقتاردىڭ ورنىن تولتىردى.

وكىنىشكە قاراي، 75 كەلىگە دەيىنگى سالماقتاعى نۇرقانات رايىس برازيليالىق ۋاندەرەي پەرەيرادان اسا المادى. ءۇش راۋندتا دا ەسە جىبەرگەن ول 0:5 بولىپ ۇتىلدى.

وسىمەن، التىنشى بوكسشىمىز جارىس جولىنان شىعىپ قالىپ وتىر.

ەرتەڭ، 10 مامىردا 1/4 فينالدىق جەكپە-جەكتەرگە كەزەك كەلەدى. وعان بىزدەن 7 بوكسشى قاتىسادى.

بۇعان دەيىن بىزدەن 48 كەلىگە دەيىنگى سالماقتاعى سانجار تاشكەنباي، 57 كەلىگە دەيىنگى سالماقتاعى سەرىك تەمىرجانوۆ جانە اسا اۋىر سالماقتاعى قامشىبەك قوڭقاباەۆ شيرەك فينالعا شىعىپ قويعان بولاتىن. سونىڭ ىشىندە سانجار – جاپون كازۋما اراتاكەمەن، سەرىك – كۋبالىق دەل-رەي سايدەل ورتا رودريگەسپەن، ال قامشىبەك وزبەك باحودير جالولوۆپەن «مەدالدار اۋىلىنا» قاراي ءوتۋ ءۇشىن كۇش سىناسادى.

سول سياقتى 54 كەلىدەگى ماحمۋد سابىرحان – گانالىق موحاممەد امادۋمەن، 67 كەلىدەگى دۋلات بەكباۋوۆ – مەكسيكالىق ميگۋەل انگەل مارتينەسپەن، 71 كەلىدەگى اسلانبەك شىمبەرگەنوۆ – فرانتسيالىق ماكان تروارەمەن، ال 80 كەلىدەگى نۇركەن ورالباي يوردانيالىق ەيشايش حۋسسەين ياشايشپەن قولعاپ تۇيىستىرەدى.

بۇل جۇپتاردا جەڭىسكە جەتكەندەر، البەتتە، كەمىندە قولا مەدال الادى.

ەرتەڭ،11 مامىردا بوكسشىلار تىنىعادى. ودان ارى، 12 مامىردا جارتىلاي فينالدىق ايقاستار وتەدى، ال فينال 13-14 مامىر كۇندەرى وينالادى.

«قازسپورت» تەلەارناسى ەرتەڭ، 10 مامىردا استانا ۋاقىتى بويىنشا ساعات 18.55-22.30 ارالىعىندا چەمپيوناتتان ترانسلياتسيا جاسايدى. وندا 48، 54، 60، 67، 75. 86 كەلىگە دەيىنگى جانە 92 كەلىدەن اۋىر سالماقتارداعى شيرەك فينالدىق جەكپە-جەكتەر كورسەتىلەدى.