«جىلدىڭ ۇلتتىق سپورتتىق جۇلدەسى» بايقاۋى جاريالاندى

قازاقستان رەسپۋبليكاسى ۇلتتىق وليمپيادا كوميتەتى «جىلدىڭ ۇلتتىق سپورتتىق جۇلدەسى» بايقاۋىنىڭ وتكىزىلۋىن جاريالايدى. بايقاۋ وسى قاراشا ايى بويى جالعاسادى. ءاربىر قازاقستاندىق ەڭ مىقتىلاردى وزدەرى تاڭدايتىن بولادى.

بايقاۋ قازاقستان رەسپۋبليكاسى ۇلتتىق وليمپيادالىق كوميتەتىنىڭ پرەزيدەنتى تيمۋر ق ۇلىباەۆتىڭ باستاماسىمەن وسىمەن ءۇشىنشى رەت وتكىزىلىپ وتىر. بۇعان دەيىنگى جىلدىڭ سپورتتىق سىيلىعىنىڭ جەڭىمپازدارىن قۇرامىندا ۇوك پەن مادەنيەت جانە سپورت مينيسترلىگىنىڭ وكىلدەرى بار ارنايى كوميسسيا تاڭداپ كەلسە، بيىل ەندى ولاردى جانكۇەرلەردىڭ وزدەرى انىقتاماق.

«جىل ىشىندەگى سپورتتىق كۇنتىزبە ءتۇرلى جارىستارعا تولى بولادى. ءار سپورت ءتۇرى بويىنشا حالىقارالىق باسەكەلەر ءوتىپ جاتادى. سول باسەكەلەردە ءبىزدىڭ سپورتشىلار ەل نامىسىن ابىرويمەن قورعاپ، جاقسى ناتيجەلەر كورسەتۋدە. بيىل «ۇلتتىق» دەگەن مارتەبە الىپ وتىرعان «سپورتتىق جۇلدە» بيىلعى جىلدى قورىتىندىلاماق. ءبىز بارلىق جانكۇيەرلەردى ۇزدىكتەردى انىقتاۋ شاراسىنا بەلسەندى قاتىسۋعا شاقىرامىز»، — دەيدى قر ۇوك باس حاتشىسى دانيار ابۋلگازين.

2017 جىلى «جىلدىڭ ۇلتتىق سپورتتىق جۇلدەسى» جاڭا تەلەۆيزيالىق فورماتتا وتەدى. جانكۇيەرلەر وزدەرى نوميناتسيالارعا قاتىسىپ جاتقاندار داۋىستارىن بەرە الادى. داۋىس بەرۋ قر ۇوك www.olympic.kz رەسمي سايتىندا قاراشانىڭ 28-نە دەيىن جالعاسادى. جەڭىمپازدار كەلەسى نوميناتسيالار بويىنشا انىقتالادى:

«جازعى سپورت تۇرلەرى بويىنشا ۇزدىك سپورتشى»
«قىسقى سپورت تۇرلەرى بويىنشا ۇزدىك سپورتشى»
«ۇزدىك جاس سپورتشى»
«جازعى سپورت تۇرلەرى بويىنشا ۇزدىك جاتتىقتىرۋشى»
«قىسقى سپورت تۇرلەرى بويىنشا ۇزدىك جاتتىقتىرۋشى»
«وليمپيادالىق سپورت تۇرلەرى بويىنشا ۇزدىك فەدەراتسيا»
«ۇزدىك سپورتتىق ءوڭىر» (رەسپۋبليكالىق ماڭىزى بار قالالار، وبلىستاردىڭ دەنە شىنىقتىرۋ جانە سپورت باسقارمالارى)
«جىل جاڭالىعى»
«جىلدىڭ ۇزدىك كومانداسى»

جىلدىڭ سپورتتىق جۇلدەسىنىڭ قورىتىندىسى سالتاناتتى تۇردە وسى جىلدىڭ 30 قاراشاسىندا شىعارىلماق. جوباعا «Hilton Astana» وتەلى، Toyota Motor Kazakhstan قولداۋ ءبىلدىردى.