قىتايدان جاياۋ شىققان قانداس استاناعا جەتتى (ۆيدەو)

بۇگىن 1 مامىردا قىتاي حالىق رەسپۋبليكاسىنان جاياۋ شىققان 26 جاستاعى قانداسىمىز ەسبول اسقار ۇلى استاناعا جەتتى. ول ءوزىنىڭ تۋعان جەرى شىڭجاڭنىڭ ماناس اۋدانىنان ەلورداعا 60 كۇندە 3 مىڭ شاقىرىمدى جاياۋ ءجۇرىپ كەلدى.

مارافونشىنى باۋىرجان مومىش ۇلى مەن قورداي كوشەلەرىنىڭ قيىلىسىندا ورنالاسقان دوستىق ۇيىندە قالا تۇرىندارى مەن قوناقتارى قارسى الدى.

كەزدەسۋدە الماتى اۋدانى اكىمىنىڭ ورىنباسارى ەسەت بايكەننىڭ ەسبول اسقار ۇلىنا العىس حات تابىس ەتىلدى.

ءسىزدىڭ ەۋرازيانىڭ تورىندەگى قازاقستاننىڭ باس قالاسى – استانانىڭ 25 جىلدىعى قارساڭىندا دوڭگەلەنگەن دۇنيەنىڭ ءجۇزىن جاياۋ ارالاپ، مارافوندى ەلوردامىزدا ءساتتى اياقتاۋىڭىزبەن شىن جۇرەكتەن قۇتتىقتايمىن. بۇگىنگى تاڭدا 1،5 ميلليونعا جۋىق تۇرعىنى بار قارقىندى دامىپ كەلە جاتقان ەلوردا كۇنى مەرەكەسى قارساڭىندا استاناعا ات باسىن تىرەۋىڭىز، اۋەلى جوسپارلانعان جولدىڭ مەجەسىنە جەتىپ، قازاعىمىزدىڭ قايسارلىق قاسيەتىن، ناسيحاتتاۋداعى ىزگى نيەتىڭىزگە ىستىق ىقىلاسىمىزدى بىلدىرەمىز، — دەلىنگەن العىس حاتتا.

وسىدان كەيىن «بولات تۇياق» قوعامدىق بىرلەسىگىنىڭ ورىنباسارى نۇباراك نۇرداۋلەت ەسبولعا وتانداستارىمىزدىڭ اتىنان ات مىنگىزىپ، شاپان جاپتى.

بۇل ساپارعا ەسبول اسقار ۇلى 4 جىل دايىندالعان ەكەن. وسى ۋاقىتتا ول كۇندەلىكتى 15-20 شاقىرىم جۇگىرۋدى ادەتكە اينالدىرىپتى.

مەن – الەمگە تارىداي شاشىلعان قاراكوز قازاقتىڭ ءبىر ۇلىمىن. 2019 جىلى قازاقستان پرەزيدەنتى قاسىم-جومارت كەمەل ۇلى قىتايعا بارعان ساپارىندا تەلەارنادان سۇحباتىن كوردىم. ول كىسىنىڭ قازاق تىلىندە ايتقان قانداستار تۋرالى ءسوزى مەنى قاتتى تەبىرەنتتى. سول كەزدە مەن وسى ساپاردى ارمانداعان ەدىم. بۇگىن مىنە، ارمانىم اقيقاتقا اينالىپ وتىر. ءوز جوسپارىمنان 3 كۇن بۇرىن جەتتىم. مىنە، استانا توپىراعىن باسىپ تۇرمىن، ەرەكشە تەبىرەنىستەمىن. قيىندىقتىڭ ءبارى ارتتا قالدى. باتىر بابالارىمىز قالدىرعان ۇلان-بايتاق جەردى تابانىممەن باسىپ كەلدىم. قازاعىمنىڭ عاجايىپ تابيعاتىن كوردىم. «الىستان ءبىر ۇلىمىز ەلىن اڭساپ كەلە جاتىر» دەپ مەنى قارسى الىپ جاتقان بارشاڭىزعا، اق جاۋلىقتى انالارعا، استانا قالاسى اكىمدىگىنە العىسىمدى ايتامىن،- دەدى ەسبول اسقار ۇلى.

ونىڭ ايتۋىنشا، جول بويى قازاقستاننىڭ كورىكتى جەرلەرىن، تاريحي ورىندارىن سۋرەتكە ءتۇسىرىپ، الەۋمەتتىك جەلىلەردە سالىپ وتىرعان. ولاردى قىتايداعى قانداستارىمىز كورىپ، جاقىن تانىستى.

اتاجۇرتقا ساعىنىشىمىز – ەرەكشە. ساپارداعى باستى ماقساتىم – ەكى ەلدىڭ دوستىعىن ناسيحاتتاپ، استاناعا الىستاعى قانداستاردىڭ اق سالەمىن جەتكىزۋ ەدى. سول ءۇشىن دە استانانىڭ مەرەيتويىنا وراي جەتۋدى ماقسات ەتكەنمىن. بۇل ساپارىم مەنىڭ جالىندى جاستىق شاعىمنىڭ ۇمىتىلماس ءبىر بەلەسى بولىپ قالادى دەپ ويلايمىن. الداعى جوسپارىم وسى ەلدە قالىپ، قازاق ەلى ءۇشىن ازاماتتىق ۇلەسىمدى قوسقىم كەلەدى، — دەدى ول.

ەسبول اسقار ۇلى 1997 جىلى 1 مامىردا قىتاي حالىق رەسپۋبليكاسىنىڭ شىڭجاڭ-ۇيعىر اۆتونوميالىق اۋدانىنىڭ سانجى ايماعى ماناس اۋدانىندا تۋعان. اتا-اناسى ەرتە قايتىس بولىپ، ناعاشى جۇرتىنىڭ قولىندا ءوسىپتى. وتباسىندا جالعىز بالا ەكەن.

ول قحر حاربين قالاسىنداعى ۋنيۆەرسيتەتتە ءبىلىم العانىن دا ايتتى.

داستان كەنجالين،

استانا

فوتو: elorda.info

 

View this post on Instagram

 

A post shared by ريزابەك نۇسىپبەك (@rizabeknusipbek)