Qytaıdan jaıaý shyqqan qandas Astanaǵa jetti (VIDEO)

Búgin 1 mamyrda Qytaı Halyq Respýblıkasynan jaıaý shyqqan 26 jastaǵy qandasymyz Esbol Asqaruly Astanaǵa jetti. Ol óziniń týǵan jeri Shyńjańnyń Manas aýdanynan elordaǵa 60 kúnde 3 myń shaqyrymdy jaıaý júrip keldi.

Marafonshyny Baýyrjan Momyshuly men Qordaı kósheleriniń qıylysynda ornalasqan Dostyq úıinde qala turyndary men qonaqtary qarsy aldy.

Kezdesýde Almaty aýdany ákiminiń orynbasary Eset Baıkenniń Esbol Asqarulyna alǵys hat tabys etildi.

Sizdiń Eýrazııanyń tórindegi Qazaqstannyń bas qalasy – Astananyń 25 jyldyǵy qarsańynda dóńgelengen dúnıeniń júzin jaıaý aralap, marafondy elordamyzda sátti aıaqtaýyńyzben shyn júrekten quttyqtaımyn. Búgingi tańda 1,5 mıllıonǵa jýyq turǵyny bar qarqyndy damyp kele jatqan elorda kúni merekesi qarsańynda Astanaǵa at basyn tireýińiz, áýeli josparlanǵan joldyń mejesine jetip, qazaǵymyzdyń qaısarlyq qasıetin, nasıhattaýdaǵy izgi nıetińizge ystyq yqylasymyzdy bildiremiz, — delingen alǵys hatta.

Osydan keıin «Bolat tuıaq» qoǵamdyq birlesiginiń orynbasary Nubárák Nurdaýlet Esbolǵa otandastarymyzdyń atynan at mingizip, shapan japty.

Bul saparǵa Esbol Asqaruly 4 jyl daıyndalǵan eken. Osy ýaqytta ol kúndelikti 15-20 shaqyrym júgirýdi ádetke aınaldyrypty.

Men – álemge tarydaı shashylǵan qarakóz qazaqtyń bir ulymyn. 2019 jyly Qazaqstan prezıdenti Qasym-Jomart Kemeluly Qytaıǵa barǵan saparynda telearnadan suhbatyn kórdim. Ol kisiniń qazaq tilinde aıtqan qandastar týraly sózi meni qatty tebirentti. Sol kezde men osy sapardy armandaǵan edim. Búgin mine, armanym aqıqatqa aınalyp otyr. О́z josparymnan 3 kún buryn jettim. Mine, Astana topyraǵyn basyp turmyn, erekshe tebirenistemin. Qıyndyqtyń bári artta qaldy. Batyr babalarymyz qaldyrǵan ulan-baıtaq jerdi tabanymmen basyp keldim. Qazaǵymnyń ǵajaıyp tabıǵatyn kórdim. «Alystan bir ulymyz elin ańsap kele jatyr» dep meni qarsy alyp jatqan barshańyzǵa, aq jaýlyqty analarǵa, Astana qalasy ákimdigine alǵysymdy aıtamyn,- dedi Esbol Asqaruly.

Onyń aıtýynsha, jol boıy Qazaqstannyń kórikti jerlerin, tarıhı oryndaryn sýretke túsirip, áleýmettik jelilerde salyp otyrǵan. Olardy Qytaıdaǵy qandastarymyz kórip, jaqyn tanysty.

Atajurtqa saǵynyshymyz – erekshe. Sapardaǵy basty maqsatym – eki eldiń dostyǵyn nasıhattap, Astanaǵa alystaǵy qandastardyń aq sálemin jetkizý edi. Sol úshin de Astananyń mereıtoıyna oraı jetýdi maqsat etkenmin. Bul saparym meniń jalyndy jastyq shaǵymnyń umytylmas bir belesi bolyp qalady dep oılaımyn. Aldaǵy josparym osy elde qalyp, qazaq eli úshin azamattyq úlesimdi qosqym keledi, — dedi ol.

Esbol Asqaruly 1997 jyly 1 mamyrda Qytaı Halyq Respýblıkasynyń Shyńjań-Uıǵyr avtonomııalyq aýdanynyń Sanjy aımaǵy Manas aýdanynda týǵan. Ata-anasy erte qaıtys bolyp, naǵashy jurtynyń qolynda ósipti. Otbasynda jalǵyz bala eken.

Ol QHR Harbın qalasyndaǵy ýnıversıtette bilim alǵanyn da aıtty.

Dastan KENJALIN,

ASTANA

FOTO: elorda.info

 

View this post on Instagram

 

A post shared by Rızabek Núsipbek (@rizabeknusipbek)