ءVى جازعى سپارتاكيادادا: الماتى قالاسىنىڭ مەرگەندەرى توپ جاردى (فوتو)

بۇگىن شىمكەنت قالاسىندا نىسانا كوزدەۋدەن VI جازعى سپارتاكياداسى اياقتالدى.

مادەنيەت جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، ءبىر اپتاعا سوزىلعان باسەكەدە 27 باعدارلامادا جۇلدە ساراپقا سالىندى. ونىڭ 12-ءسى جەكەلەي، 12-ءسى كوماندالىق سايىستا، قالعان 3 مەدال جيىنتىعى ارالاس جۇپتار اراسىندا ءوز يەسىن تاپتى. بارلىعى شىمكەنتتەگى باسەكەگە 9 وڭىردەن 138 سپورتشى قاتىستى.

بۇگىنگى ەكى جۇلدە جالپى ەسەپتەگى جەڭىمپازدى انىقتاپ بەردى. جىلجىمالى نىسانا كوزدەۋ مەن 10 مەتردەن پنەۆماتيكالىق تاپانشامەن ارالاس جۇپتىق سىندا الماتى قالاسى چەمپيون اتانىپ، جالپى ەسەپتە ءبىرىنشى ورىن الدى. ولاردىڭ ەنشىسىندە 13 التىن، 16 كۇمىس پەن 5 قولا مەدال بار. ال شىمكەنت قالاسى (13 التىن، 6 كۇمىس، 8 قولا) ەكىنشى بولسا، ۇزدىك ۇشتىكتى جامبىل وبلىسى 1 التىن، 4 قولامەن تۇيىندەدى.

وسى سپارتاكيادادا ەڭ قيىن فينال بۇگىن بولدى. ىرىكتەۋدە 586 ۇپاي جينادىم. بۇل مەنىڭ ۇزدىك كورسەتكىشىم دەي المايمىن. بۇدان كوپ بالل جيناعان كەزدەر بولدى. فينال مەن ءۇشىن ءساتسىز باستالدى. بىراق ورتاسىنا قاراي بار شەبەرلىگىمدى كورسەتە باستادىم. قارسىلاستارىمنىڭ الدىن وراپ جەڭىسكە جەتكەنىمە قۋانىشتىمىن. وسى ءسات ءۇشىن ءبىز ۇزاق دايىندالامىز. ەندى شەتەلدەگى جارىستاردان جۇلدەلى ورالۋعا بارىمدى سالامىن،- دەدى ۇلتتىق قۇرامانىڭ سپورتشىسى يسلام ساتپاەۆ.

ال الماتى قالاسىنىڭ سپورتشىسى الەكساندرا سادۋاقاسوۆانىڭ ايتۋىنشا، ول جارىستا بار مۇمكىندىگىنىڭ 60 پايىزىن كورسەتتى.

ناتيجەمە كوڭىلىم تولادى. بۇگىن بەسىنشى جۇلدەمدى جەڭىپ الدىم. كەلەسى جارىسقا دەيىن دايىندالۋعا كوپ ۋاقىت جوق. الدا جاستار اراسىنداعى الەم چەمپيوناتى كەلە جاتىر. سوسىن، ازيا ويىندارىندا جاقسى ناتيجە كورسەتۋىمىز كەرەك، — دەدى  ول.

وسىمەن وليمپيادا باعدارلاماسىنا كىرەتىن 25 سپورت تۇرىنەن VI جازعى سپارتاكيادا مارەسىنە جەتتى. نىسانا كوزدەۋدەن سوڭ 20 ءوڭىردىڭ ىشىندە جالپى ەسەپتە اناۋ ايتقانداي وزگەرىس بولعان جوق. قازىر الماتى قالاسى كوش باستاپ كەلە جاتىر. ال ودان كەيىنگى ساتىدا شىمكەنت قالاسى تۇرسا، قاراعاندى وبلىسى ءۇشىنشى ساتىنى استانا قالاسىنا بەرمەي، وزدەرىندە ساقتاپ قالدى.

ەسكە سالا كەتەيىك، 4 جىل بۇرىن نىسانا كوزدەۋدەن V جازعى سپارتاكيادا وسى شىمكەنت قالاسىندا ءوتىپ، جارىس قوجايىندارى توپ جارعان. ال جالپى ەسەپتە ەكىنشى ورىندى الماتى قالاسى العان.

شامكەن بايىربەك،

فوتو: مادەنيەت جانە سپورت مينيسترلىگى سپورتتى دامىتۋ ديرەكتسياسى

استانا