ەلەنا رىباكينا ەيستەن الەمدە كوش باستاپ كەلەدى

قازاقستاننىڭ ءبىرىنشى، الەمنىڭ 3-راكەتكاسى ەلەنا رىباكينا ەيس جاساۋ جونىنەن الەمدە كوش باستاپ كەلەدى.

قازاقستان تەننيس فەدەراتسياسىنىڭ حابارلاۋىنشا، بيىلعى ماۋسىمدا رىباكينا 44 ماتچتا 349 ەيس جاساعان. ودان كەيىن تىزىمدە فرانتسيالىق كارولين گارسيا تۇر. ونىڭ 42 ماتچتا 305 ەيس جاساۋعا شاماسى جەتكەن.  ۇشىنشى ورىندا بەلورۋس تەننيسشىسى ارينا سوبولەنكو كەلەدى. ول 48 ماتچتا 275 ەيس جاساپ، كوزگە تۇسكەن.  سونىمەن بىرگە رەسەيلىك ۆەرونيكا كۋدەرمەتوۆا (39، 206) مەن ليۋدميلا سامسونوۆا (32، 197) ءتورتىنشى، بەسىنشى ورىننان كورىنگەن.

تاعى ءبىر اتاپ وتەتىن نارسە، جاقىندا قازاقستان تەننيسشىلەرى الەمدىك رەيتينگتەگى كورسەتكىشتەرىن جاقسارتتى.

قازاقستاننىڭ ءبىرىنشى راكەتكاسى ەلەنا رىباكينا ايەلدەر تەننيسى قاۋىمداستىعى (WTA) جانە كاسىبي تەننيسشىلەر قاۋىمداستىعىنىڭ (ATP) جاڭارتىلعان رەيتينگىندە ۋيمبلدون ءتۋرنيرىن شيرەك فينالدا اياقتاسا دا بۇرىنعىشا 3-ورنىن ساقتاپ قالدى.

يۋليا پۋتينتسەۆا 56-دان 60-قا سىرعىسا، جۇپتىق سىندا اننا دانيلينا 24-تەن 25-كە، جىبەك قۇلامباەۆا 198-دەن 186-عا شىقتى.

الەكساندر بۋبليك ۋيمبلدون ءتۋرنيرىنىڭ ءتورتىنشى اينالىمىنا دەيىن جەتكەنىمەن، 26-دان 27-گە سىرعىدى. تيموفەي سكاتوۆ 138-دەن 134-كە، ميحايل كۋكۋشكين 262-دەن 223-كە، بەيبىت جۇقاەۆ 243-تەن 242-گە كوتەرىلدى.

جۇپتىق سىندا الەكساندر نەدوۆەسوۆ 48-دەن 53-كە تومەندەسە، اندرەي گولۋبەۆ 88-دەن 82-گە جوعارىلادى.

داستان كەنجالين،

استانا