«اقتوبە» رەسەيلىك باسشىسىنىڭ كەسىرىنەن گرۋزياعا ۇشا المادى

قازاقستان فۋتبول كەڭىستىگىندە كەلەڭسىز وقيعا بولدى. مۇنداي وقيعا ەلىمىز تاۋەلسىزدىك العان كەزدەن بەرى ءالى بولىپ كورگەن جوق.

كەشە «اقتوبە» فۋتبول كلۋبى كونفەرەنتسيا ليگاسىندا گرۋزيانىڭ «تورپەدو» كومانداسىمەن ويناۋ ءۇشىن كۋتايسي قالاسىنا ءبىر كۇن ەرتە بارىپ، جاتتىعۋى كەرەك ەدى. بىراق اقتوبە قالاسىنىڭ باس كومانداسى كاۆكاز ەلىنە ۋاقىتىندا بارا المادى. وسى ماسەلە الەۋمەتتىك جەلىدە كەڭىنەن تاراپ، جانكۇيەرلەردىڭ نارازىلىعىن تۋدىردى.

بەلگىلى بلوگەر ءارى فۋتبول جانكۇيەرى ارشات ورازوۆتىڭ ايتۋىنشا، گرۋزيا جاعى «اقتوبە» فۋتبول كلۋبى رەسەيدىڭ تۋلا قالاسى ارقىلى ۇشىپ كەلەتىن ۇشاققا رۇقسات بەرمەپتى. ويتكەنى، ۇشاق رەسەيدىكى، ال رف-نىڭ ۇشاقتارىنا گرۋزيادا ۇشۋعا رۇقسات بەرىلمەگەن.

چارتەردى «اقتوبە» كلۋبى رەسەيدىڭ تۋلا قالاسىنان جالداعان ەكەن. نەگە تۋلا؟ ويتكەنى، ءبىر اي بۇرىن «اقتوبەنىڭ» جاڭا باسشىسى كۋلەنكو دەگەن كىسى تۋلادان كەلدى.

ەندى باسقا ۇشاقپەن بارادى. دۇرىس جاتتىعاتىن ۋاقىتى بولمايدى. فاۆوريت بولعان ماتچتان جەڭىلىپ شىقسا، ءتىپتى ۇيات بولايىن دەپ تۇر، — دەدى ول.

الەۋمەتتىك جەلىدە «اقتوبە» سىرت الاڭدا «تورپەدودان» جەڭىلەتىن بولسا، وعان سەرگەي كۋلەنكونىڭ كانىلى بولاتىنىن ايتىلىپ جاتىر.  سەبەبى، ول ءوزى باسشىلىق ەتەتىن كوماندانىڭ رەجيمىن بۇزعان. كوماندا گرۋزياعا ۇشۋ ءۇشىن رەسەيدىڭ تۋلا قالاسىنىڭ چارتەرىنە تاپسىرىس بەرگەن. سول سەبەپتەن گرۋزيا سانكتسياعا ۇشىراعان ەلدىڭ ۇشاعىن قابىلداۋدان باس تارتقان.

ەندى رەيس بۇگىنگە قالدى. بۇگىن كوماندالار استانا ۋاقىتىمەن ساعات 23.00-دە جاسىل الاڭعا شىعۋى ءتيىس. ماتچ Qazsport ارناسىنان تىكەلەي ەفيردە كورسەتىلەدى.

بلوگەردىڭ ايتۋىنشا، نەگىزى كوماندالار سىرتتاعى ويىنعا ءبىر كۇن بۇرىن بارىپ، جاتتىعۋ وتكىزەدى. ءسويتىپ، الاڭعا ۇيرەنەدى. ال سۋپەرپرو كوماندالار اداپتاتسيا ءۇشىن 2-3 كۇن بۇرىن بارادى.

داستان كەنجالين،

استانا