كونفەرەنتسيا ليگاسى: «توبىل» مەن «اقتوبە» جارىستى جالعاستىرادى (ۆيدەو)

UEFA كونفەرەنتسيا ليگاسى ىرىكتەۋ ءتۋرنيرىنىڭ ەكىنشى ساتىسىندا قوستانايدىڭ  «توبىل» كلۋبى مەن «اقتوبە» كومانداسى كەلەسى اينالىمعا شىقتى.

«توبىل» شۆەيتساريانىڭ «بازەل» كومانداسىن ءبىرىنشى ويىندا 3:1 ەسەبىمەن جەڭگەن ەدى. ەكىنشى كەزدەسۋدە قارسىلاستارىنان 1:2 ەسەبىمەن ۇتىلىپ قالدى. سول سياقتى «اقتوبە» كۋتايسيدە جەرگىلىكتى «تورپەدو» جاساعىن 4:1 ەسەبىمەن ۇتىپ، ەكىنشى ويىندا 1:2 ەسەبىمەن جەڭىلۋگە ءماجبۇر بولدى. ءسويتىپ، ەكى قازاقستاندىق كوماندا دا قارسىلاستارىنان ءوز الاڭىندا جەڭىلسە دە ەكى ويىننىڭ ناتيجەسى بويىنشا جارىستى ودان ءارى جالعاستىراتىن بولدى.

ەندى ماتچتارعا كەلسەك، قوستاناي مەن اقتوبەدەگى ويىندارعا جانكۇيەر كوپ جينالدى. ماچتاردا ينە شانشار ورىن بولماي، فۋتبول سۇيەر قاۋىم يىق تىرەسىپ، كوماندالارىنا بولىسىپ وتىردى. اسىرەسە، اقتوبەدەگى ماتچتا فۋتبول تەرمينىندە 12-ويىنشى اتانىپ كەتكەن جانكۇيەرلەردىڭ كومانداعا قولداۋى وتە كۇشتى بولدى.

قوستانايداعى ويىندا «بازەل» ماچتى بەلسەندى باستادى. ءبىرىنشى تايمدا ەكى گول سالىپ، كوماندانى العا شىعاردى. انتون كادە 26-مينۋتتا ەسەپ اشسا، جان كەۆين وگۋستەن 32-مينۋتتا پەنالتيدەن قاقپانى ءدال كوزدەدى. الايدا ولاردىڭ قۋانىشى ۇزاققا سوزىلمادى.  ويىننىڭ 43-مينۋتىندا «بازەل» قاقپاسىنا  پەنالتي بەلگىلەنىپ، ودان سەرج دەبلە ءمۇلت كەتكەن جوق. ال ەكىنشى تايم تەڭ دارەجەدە ءوتىپ، تابلوداعا ەسەپ وزگەرمەي، سول قالپى ماتچ اياقتالدى. وسىلايشا «توبىل» قارسىلاسىنان 1:2 ەسەبىمەن جەڭىلىپ قالدى.

ەندى قوستانايدىڭ كلۋبى جارىستىڭ ءۇشىنشى ساتىسىندا 10 جانە 17 تامىزدا يرلانديانىڭ «دەرري سيتي» جاساعىمەن وينايدى.

«اقتوبە» مەن كۋتايسيدىڭ «تورپەدوسى» كوماندالارىنىڭ ويىنى تارتىستى ءوتتى. شىنى كەرەك، سىرت الاڭدا قارسىلاستارىن 4:1 ەسەبىمەن جەڭگەننەن كەيىن اقتوبەنىڭ كلۋبى وزىنە سەنىمدى ويناپ، ماتچتى ءوز  قولىنا الۋعا تىرىستى. سونىڭ ناتيجەسىندە 32-مينۋتتا ماكسيم سامورودوۆ ەسەپ اشتى.

ەكىنشى تايمدا گرۋزيالىق كوماندا تارازى باسىن تەڭەستىرۋگە ۇمتىلدى. ودان كەيىن تاعى بىرنەشە دوپتى الاڭ يەلەرىنىڭ قاقپاسىنا توعىتۋعا تىرىستى. اۋەلى گەورگي ارابيدزە 58-مينۋتتا گول سالسا، ودان كەيىن 66-مينۋتتا يراكلي بۋگريدزە ءوز كلۋبىن العا شىعاردى. ەسەپ وسىلاي ماتچتىڭ سوڭىنا دەيىن وزگەرمەي، ەكى ويىننىڭ ناتيجەسى الاڭ يەلەرىنىڭ پايداسىنا شەشىلدى.

ەندى «اقتوبە» ىرىكتەۋ ءتۋرنيرىنىڭ ءۇشىنشى ساتىسىندا 10 جانە 17 تامىزدا رۋمىنيانىڭ  «سەپسي» كلۋبىمەن كەزدەسەدى.

وكىنىشكە قاراي، شىمكەنتتىڭ «ورداباسى» كلۋبى كەلەسى اينالىمعا شىعا المادى. شىمكەنتتىڭ كومانداسى پولشادا ۆارشاسانىڭ «لەگيا» جاساعىمەن كەزدەسىپ، 2:3 ەسەبىمەن جەڭىلىس تاپتى.

ءبىرىنشى ويىن 2:2 بولىپ اياقتالعان ەدى. سوندىقتان «ورداباسىعا» ىرىكتەۋ ءتۋرنيرىن ودان ءارى جالعاستىرۋ ءۇشىن ءبىر عانا گول سالۋ كەرەك بولاتىن. الايدا، قوناقتاردىڭ شاماسى «لەگيامەن» تەڭ ويناۋعا جەتپەدى. بۇل ماتچ تا اسا تارتىستى جانە قىزىقتى ءوتتى. ويىن باسىنان كوماندالار بىردەن شابۋىلعا كوشتى. تىزگىندى جەرگىلىكتى فۋتبولشىلار ءوز قولىنا الۋعا تىرىستى.

ويىننىڭ 18-مينۋتىندا «لەگيا» فۋتبولشىسى پاۆەل ۆشولەك «ورداباسى» قاقپاشىسىمەن بەتپە-بەت كەلىپ، ونى وڭاي الداپ، ەسەپ اشتى. ودان كەيىن 42-مينۋتتا يۋري ريبەيرو ەسەپتى ەسەلەدى.

ەكىنشى تايمنىڭ 57-مينۋتىندا مەيمانداردان ۆسەۆولود سادوۆسكي ەسەپتى ءبىر گولعا قىسقارتتى. 71-مينۋتتا «لەگيا» تاعى ءبىر گول سالدى. بۇل گولدىڭ اۆتورى توماش پەكحارت اتاندى. وسىدان كەيىن «ورداباسى» ويىنشىسى سەرگەي مالىي نىسانى ءدال كوزدەپ، كومانداسىنا ءۇمىت سىيلاعانداي بولدى. الايدا ودان ءارى قوناقتاردىڭ ەسەپتى تەڭەستىرۋگە شاماسى جەتپەدى. ەگەر ماتچ 3:3 بولعاندا «ورداباسى» كەلەسى كەزەڭگە جولداما الار ەدى.

جالپى، وسى ويىندا شىمكەنتتىڭ كومانداسى جەڭىلسە دە جەڭىسكە دەگەن جىگەرىن كورسەتتى.

داستان كەنجالين،

استانا