Конференция лигасы: «Тобыл» мен «Ақтөбе» үшінші іріктеу турнирін бастады (ВИДЕО)

Футболдан UEFA Конференция лигасы үшінші іріктеу турнирінде Қостанайдың «Тобыл» клубы мен Ақтөбенің «Ақтөбе» командасы қарсыластарымен кездесті. «Тобыл» өз алаңында Солтүстік Ирландияның «Дерри Сити» жасағымен ойнап, 1:0 есебімен жеңіске жетті. «Ақтөбе» сырт алаңда Румынияның «Сепси» клубымен 1:1 есебімен тең түсті.

«Тобылдың» құрамында жалғыз голды ойынның 68-минутында Роман Асранкулов салды. Енді командалардың келесі матчы 17 тамызда болады.

Қостанайдың командасы бұған дейін Финляндияның «Хонка» (0:0, 2:1) мен Швейцарияның «Базель» (3:1, 1:2) клубтарымен ойнап, екі матчтың қорытындысы бойныша іріктеу турнирінің үшінші сатысына шықты. Енді тағы да «Тобылдың» жолы болса, Конференция лигасының плей-офф кезеңінде «Виктория» Пльзень (Чехия) мен «Гзира Юнайтед» (Мальта) командаларының арасындағы ойынның жеңімпазымен кездеседі.

«Ақтөбе» сырт алаңда Румынияның «Сепси» клубымен ойында мачтың 89-минутында гол жіберіп, алып, қолда тұрған жеңістеен айырылып қалды. Бұл кездесуде «Ақтөбенің» құрамында жалғыз голды Элдер Сантана салды.

Осылайша командалар ойынды 1:1 есебімен аяқтады.

Ақтөбелік команда Конференция лигасының екінші іріктеу сатысында Грузияның «Торпедо» (Кутаиси) клубын (4:1, 1:2) жолда қалдырған еді. Енді «Ақтөбе» өз алаңында «Сепсиді» жеңсе, плей-офф сатысында «Будё-Глимт» (Норвегия) мен «Пюник» (Армения) командаларының арасындағы мачтардың жеңімпазымен кездеседі. «Будё-Глимт» бірінші ойында қарсыласынан 3:0 есебімен басым түсті.

Дастан КЕНЖАЛИН,

АСТАНА