قوس اتتىڭ قورعانىسى

الماتى قالاسىندا «پلازا» (AFD Plaza) قوناق ءۇيىنىڭ «ت» كلۋبىندا قازاقستان شاحمات فەدەراتسياسىنىڭ ءباسپاسوز ءماسليحاتى بولدى.

قازاقستان شاحمات فەدەراتسياسى ۇيىم تاريحىنداعى جاڭا بەتبۇرىس كەزەڭىن بەلگىلەيتىن اۋقىمدى رەبرەدينگ تۋرالى مالىمدەدى. كەشەندى ترانسفورماتسيا اياسىندا قشف جاڭارتىلعان فيرمالىق ءستيلى مەن ستراتەگيالىق تۇجىرىمداماسىن، سونداي-اق قازاق مادەنيەتىنىڭ باي مۇراسىنا قۇرمەت كورسەتەتىن جاڭا لوگوتيپتى ۇسىندى.

ءبىز برەندتى قايتا قاراستىرىپ، وعان جاڭا ءمان-ماعىنا بەرىپ، ونى جارقىن ءارى ەستە قالارلىق ەتكىمىز كەلەدى. بۇل بالكىم ءححى عاسىردا بالاماسى جوق ءجولۇ ويتكەنى، جارقىن بەينەسىز قانداي دا ءبىر ىلگەرىلەۋ تۋرالى ايتۋ مۇمكىن ەمەس. بۇل بۇگىنگى كۇننىڭ شىندىعى. دەسە دە، جاسالعان رەبرەندينگتىڭ اياسى تار ماقسات نەمەسە جاي عانا گرافيكالىق وزگەرىس ەمەس. بۇل ءبىزدىڭ قۇندىلىقتارىمىزدىڭ، ەۆوليۋتسيامىزدىڭ جانە كەمەلدىككە دەگەن ۇمتىلىسىمىزدىڭ كورىنىسى، – دەدى قشف پرەزيدەنتى تيمۋر تۋرلوۆ.

جاڭارتىلعان فيرمالىق ستيل ەلىمىزدىڭ مادەني تەرەڭدىگى مەن بولاشاققا اشىقتىعىن كورسەتەتىن ءداستۇر مەن قازىرگى زاماننىڭ ۇيلەسىمى. ونىڭ نەگىزىندە ءال-اۋقات پەن مولشىلىقتى بەينەلەيتىن، قازاق مادەنيەتىندەگى دانالىقتىڭ نىشانىمەن جانە شاحماتتاعى ەرەكشە فيگۋرا – اتتىڭ بەينەسىمەن توعىسقان ەجەلگى «ءمۇيىز» ويۋ-ورنەگى جاتىر. وتكەن مەن بۇگىننىڭ ۇشتاسۋى فەدەراتسيانىڭ قازاقستاندى باي تاريحي مۇرانىڭ ساقتاۋشىسى رەتىندە عانا ەمەس، شاحماتتى دامىتۋ ءۇشىن وزىق تەحنولوگيالاردى پايدالاناتىن الەمدىك قوعامداستىقتىڭ پروگرەسسيۆتى قاتىسۋشىسى رەتىندە كورسەتۋگە دەگەن ۇمتىلىسىن بىلدىرەدى.

وتكەن كەزەڭدە ءبىزدىڭ فەدەراتسيا الەمدىك شاحمات كارتاسىندا ويىپ ورىن الدى. ونى حالىقارالىق شاحمات فەدەراتسياسىنداعى ارىپتەستەرىمىز دە اتاپ ءوتتى. قازاقستان بىرنەشە رەت ءارتۇرلى الەم، ازيا چەمپيوناتتارىنىڭ، شاحمات ءتاجى ءۇشىن ماتچ سياقتى ماڭىزدى وقيعالاردىڭ ورنى بولدى.  قشف شاحماتتى تانىمال ەتۋگە باعىتتالعان بىرقاتار جوبالاردى ىسكە اسىرۋدا ۇدەمەلى جۇمىستار اتقاردى. ءبىزدىڭ رەبرەندينگ – بۇل ءبىزدىڭ ءوز الدىمىزعا ءورشىل مىندەتتەر قويعان جاڭا كەزەڭنىڭ بەينەسى. مىسالى، «مەكتەپتەگى شاحمات» جوباسى اياسىندا ءبىز ۇكىمەتپەن، اكىمدىكتەرمەن بىرلەسە وتىرىپ، 5 جىلدا  باستاۋىش سىنىپ بالالارىنىڭ 20%-نا دەيىن قامتۋدى جوسپارلاپ وتىرمىز. بۇل ەلدەگى شاحماتتىڭ دامۋىنا ۇلكەن سەرپىن بەرەدى جانە زياتكەرلىك ۇلتتىڭ قالىپتاسۋىنا قوسىلعان ۇلكەن ۇلەس بولادى، – دەدى قشف ءبىرىنشى ۆيتسە-پرەزيدەنتى، ازيا شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ.

قشف پرەزيدەنتى تيمۋر تۋرلوۆتىڭ ايتۋىنشا، جالپى رەبرەندينگتىڭ اۋقىمىنا تەك كورنەكى بەينەلەر عانا جاسىرىلماعان، وعان قشف جۇمىسىنداعى جۇيەلى وزگەرىستەر، سونداي-اق ءبىزدىڭ جۇمىسىمىزدىڭ ودان ارعى جوسپارلارى دا كىرەدى.

وسى تۇرعىدا ءبىزدىڭ فەدەراتسيامىز كەزەڭ-كەزەڭىمەن اۋقىمدى شارالار كەشەنىن جۇزەگە اسىرۋدا. سولاردىڭ ءبىرى – فيليالدىق جەلىنى دامىتۋ. بۇل ءبىز جىلدامداتۋدى كوزدەيتىن وتە ماڭىزدى ماسەلە. ال وسى فيليالدار جەرگىلىكتى جەرلەردە ءتۇرلى باعدارلامالاردى ىسكە اسىرۋ كەزىندە جۇمىستىڭ نەگىزگى قۇرالىنا اينالۋى ءتيىس، — دەپ قوستى قشف پرەزيدەنتى تيمۋر تۋرلوۆ.

قشف پرەزيدەنتىنىڭ پىكىرىنشە، فيليالدىق جەلىنى دامىتۋدىڭ ماڭىزدى قوزعاۋشى كۇشى رەسپۋبليكالىق «شاحمات كەرۋەنى» جوباسى بولۋى ءتيىس. بۇل جوبانىڭ ىسكە قوسىلۋى دا ءباسپاسوز ءماسليحاتىندا جاريالاندى.

«شاحمات كەرۋەنى» – قازاقستاننىڭ بارلىق وڭىرلەرىندە شاحمات سپورتىن ناسيحاتتاۋعا باعىتتالعان ءورشىل جوبا. جوبانى ازىرلەۋدە شابىتتاندىرعان ۇلى جىبەك جولى بولدى. ويتكەنى، ول بۇكىل الەم بويىنشا ساۋدا-ساتتىقپەن قاتار ءارتۇرلى حالىقتاردىڭ مادەني جانە سپورتتىق مۇرالارىن الىپ ءجۇردى. قازاقستان اۋماعىنداعى قالالاردا «شاحمات كەرۋەنىن» ۇيىمداستىرا وتىرىپ، فەدەراتسيانىڭ باس سەرىكتەس Freedom Broker-ءدىڭ قولداۋىمەن وڭىرلەردە شاحمات سپورتىن نىعايتۋعا جانە فيليالداردىڭ سەنىمدى جەلىسىن قۇرۋعا ۇمتىلادى، – دەپ ايتتى قشف اتقارۋشى ديرەكتورى گۇلميرا داۋلەتوۆا.

«شاحمات كەرۋەنى» اياسىندا 20 قالادا بليتس بويىنشا اشىق شاعىن تۋرنيرلەر وتەدى.ونىڭ شارىقتاۋ شەگى ءىرى جۇلدە قورى تىگىلگەن گراند-فينال بولادى. وڭىرلىك تۋرنيرلەر وسى ايدا كوكشەتاۋدا، پەتروپاۆلدا، قوستانايدا، قاراعاندىدا، پاۆلوداردا، سەمەيدە، وسكەمەندە ءوتتى. ال كەلەسى ايدا تالدىقورعاندا، قوناەۆتا، تارازدا، شىمكەنتتە، تۇركىستاندا، قىزىلوردادا، جەزقازعاندا، اقتوبەدە، ورالدا، اتىراۋدا جانە اقتاۋدا وتەدى. وڭىرلىك كەزەڭدەردىڭ جەڭىمپازدارى كۇز مەزگىلىنىڭ سوڭعى ايىنىڭ العاشقى ونكۇندىگىندە تۇركىستان قالاسىندا وتەتىن گراند-فينالدا كەزدەسەدى.

1992 جىلى قازاقستان شاحمات فەدەراتسياسىڭ نەگىزى قالاندى. فەدەراتسيانىڭ ءبىرىنشى باسشىسى اقىن، جازۋشى، قوعام قايراتكەرى ولجاس سۇلەيمەنوۆ بولدى. تاۋەلسىز قازاقستاننىڭ شاحمات فەدەراتسياسىن قۇرۋدىڭ باستاماشىلارىنىڭ ءبىرى عاليموللا سايدەنوۆ ەدى. 1992 جىلى ءفيليپپيننىڭ مانيلا قالاسىندا وتكەن قازاقستان ءۇشىن دەبيۋتتىك دۇنيەجۇزىلىك وليمپيادادا ەرلەر مەن ايەلدەر قۇراماسىنا جەتەكشىلىك ەتتى. عاليموللا سايدەنوۆ الەكساندر سينياۆسكيمەن بىرلەسىپ قازاقستاننىڭ شاحمات فەدەراتسياسىنىڭ بۇرىنعى لوگوتيپىن ازىرلەگەنىن اتاپ وتكەن ءجون.

سوڭعى ون جىلدا قازاقستاندىق شاحمات قارقىندى دامۋدا. بالالار، جاسوسپىرىمدەر جانە جاستار اراسىنداعى الەم چەمپيوناتتارىندا قازاقستاندىقتار 100-دەن استام مەدال جەڭىپ الدى. ءبىزدىڭ ايەلدەر قۇراماسى – ەڭ كەلەشەگى زور قۇرامالاردىڭ ءبىرى. جانسايا ابدىمالىك، دينارا سادۋاقاسوۆا، ءبيبىسارا اساۋباەۆا الەمدىك ايەلدەر شاحماتىنىڭ ەليتاسىنا كىرەدى. ۇنەمى جاڭا ەسىمدەر انىقتالىپ، باسەكەگە قابىلەتتى ويىنشىلاردىڭ ءبۇتىن بۋىنى ءوسىپ كەلەدى. سوندىقتان الەمدىك شاحمات ارەناسىندا قازاقستاننىڭ تانىمالدىعى كۇننەن-كۇنگە ارتىپ كەلەدى.

2022 جىلدىڭ قىسىندا الماتىدا راپيد پەن بليتستەن شاحماتتان الەم چەمپيوناتى سالتاناتتى جەڭىسپەن اياقتالدى. قازاقستاندىق ءبيبىسارا اساۋباەۆا بليتس بويىنشا چەمپيوناتتىڭ التىنىن قانجىعاسىنا بايلادى، ال دينارا سادۋاقاسوۆا راپيد بويىنشا ۆيتسە-چەمپيون اتاندى.

بيىلعى جىلدىڭ كوكتەمىندە استانادا شاحمات ءتاجى ءۇشىن ماتچ ءوتتى. قازاقستان استاناسىندا 17-ءشى الەم چەمپيونى انىقتالدى.

2023 جىلعى جازىندا كاسپي تەڭىزىنىڭ جاعالاۋىندا اقتاۋ قالاسىندا World Schools Team Championship ءوتتى، وعان 53 ەلدەن 400-دەن استام ويىنشى قاتىستى.

فەدەراتسيا قر-دا شاحماتتى ناسيحاتتاۋعا، قازاقستاندىق ۇلتتىڭ زياتكەرلىك ەليتاسىن قالىپتاستىرۋعا، سونداي-اق جەتەكشى سپورتشىلار مەن قۇراما كوماندالاردىڭ حالىقارالىق جارىستارعا بەلسەندى قاتىسۋىنا بارلىق كۇش-جىگەرىن باعىتتايدى.

نۇرلان قۇمار،

الماتى