كۇرەستەن ءاچ: ءجاميلا باقبەرگەنوۆا قولا جۇلدە ءۇشىن كۇرەسەدى

سەربيا استاناسى — بەلگرادتا كۇرەس تۇرلەرىنەن ءوتىپ جاتقان الەم چەمپيوناتىندا ۇلتتىق قۇراما كوماندانىڭ مۇشەسى ءجاميلا باقبەرگەنوۆا قولا جۇلدەسى ءۇشىن كۇرەسەءتىن بولدى. ول 72 كگ سالماققا دەيىنگى سىندا موڭعوليانىڭ وكىلى داۆااناسان ەنح-امارينعا جول بەردى. ەكى سپورتشى بيىل كوكتەمدە استاناداعى ازيا چەمپيوناتىنىڭ جارتىلاي فينالىندا كۇرەسكەندە، باقبەرگەنوۆانىڭ مەرەيى ۇستەم بولعان. سول كەزدە ول قارسىلاسىن 11:0 ەسەبىمەن جەڭگەن ەدى.

ءجاميلا باقبەرگەنوۆا  وسىعان دەيىن ەكى رەت الەم چەمپيوناتىنىڭ فينالىنا شىعىپ، 2019 جىلى وسلودان، بىلتىر بەلگرادتان كۇمىس جۇلدەمەن ەلگە قايتقان.

جارتىلاي فينالدا جەڭىلىپ جاتقان سوڭ ءجاميلا تاۋەكەلگە باردى. سول كەزدە تاكتيكا جاعىنان قاتەلىك جىبەردى. ءجاميلا چەمپيونات قارساڭىنداعى وقۋ-جاتتىعۋ جيىنى كەزىندە تۇماۋراتىپ قالدى. سودان جاتتىعۋدى بىرنەشە كۇنگە توقتاتتىق. سونىڭ سالدارىنان مۇندا تولىق بابىندا كەلە المادى. موڭعوليالىق بالۋان وسال ەمەس. لايىقتى قارسىلىق كورسەتتى. وسىعان دەيىن ءجاميلا ەكەۋى بىرنەشە رەت كۇرەسكەن. بارلىق كەزدەسۋ وسىنداي قيىن بولعان ەدى. ەندى قولا مەدال ءۇشىن بەلدەسۋگە دايىندالامىز. كەلە جاتقان ازيا ويىندارىندا ول 76 كگ سالماقتا باق سىنايدى. بۇل ءجاميلانىڭ ءوز سالماعى دەپ ايتا الامىن، -دەپ ايتتى ءجاميلا باقبەرگەنوۆانىڭ جەكە جاتتىقتىرۋشىسى سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

باقبەرگەنوۆا الەم چەمپيوناتىن 1/8 اينالىمنان باستاپ، ەۋروپا چەمپيوناتىنىڭ قولا جۇلدەگەرى سەرب فانني ناگيدىڭ جاۋىرىنىن جەرگە تيگىزىپ، سوسىن، رەسەيلىك كسەنيا بۋراكوۆادان 7:1 ەسەبىمەن ايلاسىن اسىردى.

بۇگىن فينالدا داۆااناسان امەريكالىق اميت ەلورمەن كۇش سىناسادى. ال ءجاميلا باقبەرگەنوۆا مەن فرانتسيالىق كەندرا داشەنىڭ قولا مەدال جولىنداعى قارسىلاسى بۇگىن كۇندىز انىقتالادى.

وسى تۇستا ءجاميلا باقبەرگەنوۆا (72 كگ) سارى قۇرلىق بəسەكەسىندە ءۇش رەت جەڭىمپاز اتانعان تۇڭعىش قازاق بالۋانى ەكەنىن ايتا كەتەيىك. قازىر ونىڭ ەنشىسىندە ازيا چەمپيوناتىنىڭ بەس مەدالى بار (3 التىن، 1 كۇمىس، 1 قولا).

قازاق سپورتشىسى چەمپيوناتتان كەيىن ۇلتتىق قۇرامامەن ەلگە ورالىپ، قىتايدا وتەتىن ءحىح جازعى ازيا ويىندارىنا دايىندىقتى باستايدى. حانچجوۋ قالاسىندا ول وليمپيادا باعدارلاماسىنا كىرەتىن 76 كگ سالماقتا باق سىناپ، تاجىريبەلى ەلميرا سىزدىقوۆانىڭ ورنىندا كۇرەسەدى.

سونداي-اق كەشە سىنعا تۇسكەن ۇلتتىق قۇراما ساپىنداعى التىن شاعاەۆا (53 كگ) ءبىرىنشى اينالىمدا قىتايلىق، يرينا كۋزنەتسوۆا (62 كگ) ەكىنشى بەلدەسۋىندە گەرمانيالىق، ەلەنا شالىگينا (68 كگ) ەكىنشى بەلدەسۋىندە موڭعوليا سپورتشىسىنان جەڭىلىپ قالدى.

شامكەن بايىربەك،

استانا

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى