چەمپيون جاقسىلىق ەر اتاندى

بۇگىن كلاسسيكالىق كۇرەستەن الەم، وليمپيادا چەمپيونى جاقسىلىق ۇشكەمپىروۆ «قازاقستاننىڭ ەڭبەك ەرى» اتاعىن الدى! بۇل جوعارى ماراپاتتى اقوردادا پرەزيدەنت نۇرسۇلتان نازارباەۆ تاپسىردى.

جاقاڭدى العاش قۇتتىقتاۋشىلاردىڭ ءبىرى مەن بولدىم. جاسىراتىنى جوق، جاقسىلىلىقتى وسى اتاققا ۇسىنىپ، باسپاسوزدە كەڭىنەن ناسيحاتتاعان، سوناۋ 2015 جىلدان باستاپ، اقورداعا سپورتشىلاردىڭ قولىن قويعىزىپ، حات ۇيىمداستىرعانداردىڭ ءبىرى دە مەن ەدىم. مىنە، اقىرى ارمان ورىندالدى! ەڭ باستىسى،قازاق حالقىنىڭ،قازاق ۇلتىنىڭ تىلەگى قابىل بولدى دەسەم ارتىق ايتپاعان بولارمىن. جاقسىلىقتى بۇكىل قازاق جاقسى كورەدى، بۇكىل قازاقستاندىقتار قۇرمەتتەيدى. جاقسىلىق تا حالىقتىڭ مۇنداي قۇرمەتىنە لايىق! …

ءالى ەسىمدە، 1980 جىلعى ماسكەۋ وليمپياداسىندا كلاسسيكالىق كۇرەستەن 48 كيلو سالماقتا چەمپيون بولعان جاقسىلىقتى قۇراماداعى قالعان 9 پالۋان سالماقتارى بويىنشا كەزەك-كەزەك توبەلەرىنە كوتەرىپ، شەشىنەتىن بولمەگە اياعىن جەرگە تيگىزبەي جەتكىزگەنى! مەن دە سوندا سوڭدارىنا ەرىپ، جۇگىرىپ جۇرگەنمىن. سودان جاقسىلىقتى الىپ، وبلىستاردى ارالادىق. مەن ول كەزدە «لەنينشىل جاس» گازەتىنىڭ سپورت ءبولىمىنىڭ مەڭگەرۋشىسىمىن. حالىق قوعاداي جاپىرىلىپ، جاقسىلىقپەن كەزدەسۋگە اعىلادى. وبلىستىڭ ءبىر اۋدانىنان ەكىنشىسىنە وتكەندە ۇزىن جول بويىندا تاياققا سۇيەنگەن قارتتار، كيمەشەكتى اجەلەردەن باستاپ، بەسىكتەگى بالاعا دەيىن توپ-توپ بوپ تۇرادى. توقتاپ امانداسادى جاقاڭ، ۇلكەندەر بەتىنەن سۇيەدى. بار شارۋالارى سول! شىركىن، ءبىر جاقسىنىڭ وتىنا مىڭدار جىلىنعان سول جىلدار-اي!!! پالۋان دەپ جۇرگەن جاقاڭ دا شەشەن بوپ الدى. بىردە امانگەلدى اۋدانىنىڭ ءبىر مەكتەبىندە كەزدەسۋ بولدى. ءبىر وقۋشى: «جاقسىلىق اعا، ءبىز ءسىزدى وليمپيادا چەمپيونى دەگەنگە ءداۋ، الىپ كىسى دەپ جۇرسەك، ءسىز شىناشاقتاي عانا ەكەنسىز عوي!» دەگەنى. جاقسىلىقتىڭ ورنىنا مەن تەرلەپ كەتتىم. جاقاڭ ساسقان جوق. ء«يا، چەمپيون بولعان كەزدە مەن ءوزىڭ ايتقانداي الىپ ەدىم. سودان بەرى وسىنداي كەزدەسۋلەردە ەل مەنەن تابارىككە ج ۇلىپ الىپ-الىپ، وسىنداي بولىپ قالدىم!» دەگەنى. بۇل 1984 جىل بولاتىن.
مۇنداي ەستەلىك مەندە مىڭ توم بولىپ، قاتتالىپ جاتىر. سول 1980 جىلدان بەرى جاقاڭ ەكەۋمىزدىڭ جۇبىمىز جازىلعان جوق. مەنىڭ «اۋىلدان شىققان الىپتار» اتتى كىتابىمداعى «تەگىستىكتىڭ تەنتەگى» حيكاياتى دا وسى دوستىقتان تۋعان شىعارما. مەن جاقسىلىقتى سپورتشىدان گورى ءابدىسالان،ابىلسەيىت، عۇسمان،ءامين، تيمۋر اعالار سەكىلدى سپورت سيمۆولدارىنىڭ قاتارىنا قوسقالى دا تالاي جىل بولدى. مىنا ناگرادا ءدال سونىڭ دالەلى عانا!

نەسىپ جۇنىسباي ۇلى،

جازۋشى، پۋبليتسيست

قازاقستان رەسپۋبليكاسىنىڭ ەڭبەك سىڭىرگەن قايراتكەرى