Chempıon Jaqsylyq er atandy

Búgin klassıkalyq kúresten álem, Olımpıada chempıony Jaqsylyq ÚShKEMPIROV «QAZAQSTANNYŃ EŃBEK ERI» ataǵyn aldy! Bul joǵary marapatty Aqordada Prezıdent Nursultan Nazarbaev tapsyrdy.

Jaqańdy alǵash quttyqtaýshylardyń biri men boldym. Jasyratyny joq, Jaqsylylyqty osy ataqqa usynyp, baspasózde keńinen nasıhattaǵan, sonaý 2015 jyldan bastap, Aqordaǵa sportshylardyń qolyn qoıǵyzyp, hat uıymdastyrǵandardyń biri de men edim. Mine, aqyry arman oryndaldy! Eń bastysy,qazaq halqynyń,qazaq ultynyń tilegi qabyl boldy desem artyq aıtpaǵan bolarmyn. Jaqsylyqty búkil qazaq jaqsy kóredi, búkil qazaqstandyqtar qurmetteıdi. Jaqsylyq ta halyqtyń mundaı qurmetine laıyq! …

Áli esimde, 1980 jylǵy Máskeý Olımpıadasynda klassıkalyq kúresten 48 kılo salmaqta chempıon bolǵan Jaqsylyqty quramadaǵy qalǵan 9 palýan salmaqtary boıynsha kezek-kezek tóbelerine kóterip, sheshinetin bólmege aıaǵyn jerge tıgizbeı jetkizgeni! Men de sonda sońdaryna erip, júgirip júrgenmin. Sodan Jaqsylyqty alyp, oblystardy araladyq. Men ol kezde «Lenınshil jas» gazetiniń sport bóliminiń meńgerýshisimin. Halyq qoǵadaı japyrylyp, Jaqsylyqpen kezdesýge aǵylady. Oblystyń bir aýdanynan ekinshisine ótkende uzyn jol boıynda taıaqqa súıengen qarttar, kımeshekti ájelerden bastap, besiktegi balaǵa deıin top-top bop turady. Toqtap amandasady Jaqań, úlkender betinen súıedi. Bar sharýalary sol! Shirkin, bir jaqsynyń otyna myńdar jylynǵan sol jyldar-aı!!! Palýan dep júrgen Jaqań da sheshen bop aldy. Birde Amangeldi aýdanynyń bir mektebinde kezdesý boldy. Bir oqýshy: «Jaqsylyq aǵa, biz Sizdi Olımpıada chempıony degenge dáý, alyp kisi dep júrsek, Siz shynashaqtaı ǵana ekensiz ǵoı!» degeni. Jaqsylyqtyń ornyna men terlep kettim. Jaqań sasqan joq. «Iá, chempıon bolǵan kezde men óziń aıtqandaı alyp edim. Sodan beri osyndaı kezdesýlerde el menen tábárikke julyp alyp-alyp, osyndaı bolyp qaldym!» degeni. Bul 1984 jyl bolatyn.
Mundaı estelik mende myń tom bolyp, qattalyp jatyr. Sol 1980 jyldan beri Jaqań ekeýmizdiń jubymyz jazylǵan joq. Meniń «Aýyldan shyqqan alyptar» atty kitabymdaǵy «TEGISTIKTIŃ TENTEGI» hıkaıaty da osy dostyqtan týǵan shyǵarma. Men Jaqsylyqty sportshydan góri Ábdisalan,Ábilseıit, Ǵusman,Ámın, Tımýr aǵalar sekildi SPORT SIMVOLDARYNYŃ qataryna qosqaly da talaı jyl boldy. Myna nagrada dál sonyń dáleli ǵana!

Nesip JÚNISBAIULY,

jazýshy, pýblııst

Qazaqstan Respýblıkasynyń eńbek sińirgen qaıratkeri