فۋتزالدان قازاقستان قۇراماسى الەم چەمپيوناتىنا جولداماعا تالاسادى

14 جەلتوقساندا استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا 2024 جىلعى فۋتزالدان الەم چەمپيوناتىنىڭ ەليتالىق ىرىكتەۋ ءتۋرنيرى اياسىندا قازاقستان مەن نيدەرلاند قۇرامالارىنىڭ  ماتچى بولادى.  ماتچ ساعات 20:30-دە باستالادى. ويىندى تىكەلەي ەفيردە «QAZSPORT» تەلەارناسى كورسەتەدى، دەپ حابارلادى قازاقستان فۋتبول فەدەراتسياسى.

قازاقستان قۇراماسى الەم چەمپيوناتىنا ىرىكتەۋ تۋرنيرىندە رۋمىنيا، ازەربايجان جانە نيدەرلاند قۇرامالارىمەن بىرگە ا توبىندا ويناپ جاتىر. قازىر فۋتزالدان ەلىمىزدىڭ باس كومانداسى ءتورت ويىننان كەيىن 12 ۇپايمەن كوش باستاپ كەلەدى. ال قورجىنىندا 1 ۇپايى بار نيدەرلاند قۇراماسى ءتورتىنشى ورىندا تۇر.

ەكى قۇراماعا بۇعان دەيىن ەكى رەت كەزدەسىپ، ەكى ويىندا دا قازاقستان قۇراماسى جەڭدى.  العاش رەت 2019 جىلى رۋمىنيانىڭ پياترا-نيامتس قالاسىندا بولعان ماتچتا ەلىمىز قۇراماسى قارسىلاسىن 5:0 ەسەبىمەن جەڭسە،  بيىلعى ىرىكتەۋ تۋرنيرىندە سىرت الاڭدا نيدەرلاندتان 2:0 ەسەبىمەن باسىم ءتۇستى.

ەكى قۇرامانىڭ دا ەۋروپا جانە الەمدىك رەيتينگىندەگى ورىندارىندا الشاقتىق بار. قازاقستان ەۋروپا رەيتينگىندە  4-ورىندا، الەمدىك رەيتينگتە 7-ورىندا بولسا، «قىزعالداقتار» ەلىنىڭ كومانداسى قارت قۇرلىقتىڭ تىزىمىندە 18-ورىندا، الەمدىك رەيتينگتە 34-ورىندا كەلەدى.

ەندى وسى ماچتا قازاقستان قۇراماسى جەڭىسكە جەتسە، كەلەسى جىلى بولاتىن الەم چەمپيوناتىنا جولداما الادى. ال مۋنديال 2024 جىلعى 14 قىركۇيەك پەن 6 قازان ارالىعىندا وزبەكستاننىڭ تاشكەنت قالاسىندا بولادى.

فۋتزالدان الەم چەمپيوناتى ەليتالى ءتۋرنيرى 20 جەلتوقساندا اياقتالادى. 14 مەن 20 جەلتوقساندا الەم چەمپيوناتىنا  قاتىساتىن جەتى كوماندانىڭ بەسەۋى انىقتالادى.

ەليتالى راۋندتاعى بەس توپتىڭ جەڭىمپازدارى الەمدىك دوداعا تىكەلەي جولداما الادى. ال ەكىنشى ورىن العان ءتورت ۇزدىك كوماندا پلەي-وفف ماتچتارىندا وينايدى. ولاردىڭ جەرەبەسى 2024 جىلدىڭ 25 قاڭتاردا تارتىلادى. ال ءاچ جولداماسى ءۇشىن قالعان ەكى ماتچ 2024 جىلدىڭ 8-17 ءساۋىر كۇندەرىنە جوسپارلانعان.

2024 جىلعى الەم چەمپيوناتىنىڭ ىرىكتەۋ ءتۋرنيرى. ەليتالى كەزەڭ. «A» توبى

ويىن ناتيجەلەرى:

15 قىركۇيەك: نيدەرلاند — قازاقستان 0:2

15 قىركۇيەك: رۋمىنيا — ازەربايجان 3:1

20 قىركۇيەك: قازاقستان — رۋمىنيا 4:3

20 قىركۇيەك: ازەربايجان — نيدەرلاند 6:1

6 قازان: رۋمىنيا — نيدەرلاند 2:1

6 قازان: ازەربايجان — قازاقستان 2:4

10 قازان: نيدەرلاند — رۋمىنيا 1:1

11 قازان: قازاقستان — ازەربايجان 3:2

قالعان ويىنداردىڭ كەستەسى:

14 جەلتوقسان: قازاقستان — نيدەرلاند

15 جەلتوقسان: ازەربايجان — رۋمىنيا

20 جەلتوقسان: رۋمىنيا — قازاقستان

20 جەلتوقسان: نيدەرلاند – ازەربايجان.