ۇلتتىق قۇراما مەرگەندەرى تاعى ءتورت جۇلدەنى جەڭىپ الدى

نىسانا كوزدەۋدەن يندونەزيانىڭ دجاكارتا قالاسىندا ءوتىپ جاتقان ازيا چەمپيوناتىندا قازاقستان قۇراماسىنىڭ قورجىنىنا تاعى 4 مەدال ءتۇستى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ۆينتوۆكامەن 50 مەتردەن جاتىپ وق اتۋدا ارينا التۋحوۆا چەمپيون اتانسا (626،8 ۇپاي). الەكساندرا لە قولا جۇلدەگەر اتاندى (618،4 ۇپاي). تاعى ءبىر ۇلتتىق قۇرامانىڭ سپورتشىسى ەليزاۆەتا بەزرۋكوۆا ءتورتىنشى ساتىدان كورىندى (617،2). ناتيجەسىندە كوماندالىق سىندا دا قازاقستان التىن جۇلدەنى جەڭىپ الدى. ال تاپانشامەن 25 مەتردەن نىسانا كوزدەۋدە نيكيتا چيريۋكين 568 ۇپايمەن ۇزدىك ۇشتىكتى تۇيىندەدى.

بۇل ەكى باعدارلامادا وليمپيادا ليتسەنزياسى ساراپقا سالىنعان جوق.

قازىر جالپى ەسەپتە قازاقستان 3 التىن، 1 كۇمىس، 2 قولا مەدالمەن ءتورتىنشى ورىندا كەلە جاتىر. قۇرلىق چەمپيوناتى 18 قاڭتاردا اياقتالادى.