ستەند اتۋدان الىشەر ايسالباەۆ پەن ماريا دميترەنكو ازيا چەمپيونى اتاندى

ستەند اتۋدان كۋۆەيتءتىڭ استاناسىندا ءوتىپ جاتقان ازيا چەمپيوناتىنىڭ تراپ باعدارلاماسىندا قازاقستان قۇراماسى ەكى التىن جۇلدەنى جەڭىپ الدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسى.

جۇپتىق سىندا الىشەر ايسالباەۆ پەن ماريا دميترەنكو 140 ۇپاي جيناپ، ەل ءانۇرانىن شىرقاتتى. كۇمىس مەدال يران مەرگەنى موحامماد بەيرانۆاند پەن مارزيەح پارۆارەشتىڭ (137 ۇپاي) ەنشىسىندە. ۇزدىك ۇشتىكتى قىتايلىق سپورتشىلار يۋحاو گۋو مەن سياوتسزين ۆان (136 ۇپاي) تۇيىندەدى.

قازاقستان-2 قۇراماسىندا ونەر كورسەتكەن ايجان دوسماعامبەتوۆا مەن ماكسيم بەدارەۆ جالپى ەسەپتە 129 ۇپاي الىپ، 12-ساتىدان كورىندى.

پاريج وليمپياداسىندا تراپ باعدارلاماسىنداعى ارالاس جۇپتىق سىندا (ميكست) جۇلدە ساراپقا سالىنبايدى. ونىڭ ورنىن الدىڭعى ويىنداردان سىرت قالعان سكيتتەگى ميكست باسادى. سول سەبەپتى وسى جارىستا ەشقانداي ليتسەنزيا تاراتىلعان جوق.

ستەند اتۋدان ازيا چەمپيوناتى 22 قاڭتارعا دەيىن سوزىلادى. بيىل 35 ەلدەن جينالعان 350-دەن استام مەرگەن سىنعا ءتۇسىپ جاتىر. كۋۆەيتتە پاريج وليمپياداسىنىڭ 8 ليتسەنزياسى ساراپقا سالىنادى.

بۇدان بۇرىن حابارلانعانداي، ۇلتتىق قۇراما تراپ باعدارلاماسىندا 1 التىن، 2 قولا مەدال جەڭىپ الدى.

تراپ باعدارلاماسىنىڭ فينالىندا ماريا دميتريەنكو 30 ۇپاي جيناپ، ءۇشىنشى ورىندى يەلەندى. مۇندا پاريج وليمپياداسىنىڭ قوس جولداماسى جەڭىمپاز اتانعان ۆان يۋ ليۋ (تايبەي) مەن كۇمىس جۇلدەگەر چجان سينتسيۋگە (قىتاي) بۇيىردى. ماريا ءسال ەرتەرەكتە ىرىكتەۋدە 117 نىسانانى ءدال كوزدەپ، ءبىرىنشى ورىنمەن فينالعا جولداما العان بولاتىن.

ال كوماندالىق سىندا ايجان دوسماعامبەتوۆا، اناستاسيا پريلەپينا مەن ماريا دميتريەنكو ۇشتىگى قىتاي مەن ءۇندىستان مەرگەندەرىنە ەسە جىبەرىپ، قولا جۇلدەگەر اتاندى.

جاستار اراسىندا قازاقستان ەرلەر قۇراماسى ەشكىمگە دەس بەرمەي، التىن مەدالدى جەڭىپ الدى. ەل نامىسىن نيكيتا مويسەەۆ، بوگدان كونچەنكو مەن نيكيتا چيكۋلاەۆ قورعادى.

سكيت جəنە تراپ باعدارلاماسىنا ەلىمىزدەن 18 سپورتشى قاتىسىپ جاتىر.