Qazaqstan sportshylary qurmet tuǵyryna kóterildi

Taekvondo: Túrkııanyń Antalıa qalasynda taekvondodan G1 sanatyna kiretin Turkish Open halyqaralyq jarysynda Qazaqstan quramasy eresekter arasynda 3 medal jeńip aldy. Jansel Denız (73 kg) ben Samırhon Ababakırov (73 kg) kúmis júldeger atansa, Rýslan Japarov (+87 kg) úzdik úshtikti túıindedi.

Al Tegerandaǵy (Iran) Fajr Open halyqaralyq týrnırinde jerlesterimiz toǵyz júlde jeńip aldy. Beıbarys Qablan (87 kg) men Marııa Sevostıanova (57 kg) kúmis júldeger atansa, Tamerlan Tileýles (58 kg), Nurqanat Qojahmet (80 kg), Nurlan Myrzabaev (87 kg), Maqsat Orynbasar (74 kg), Botakóz Qapanova (49 kg), Kamıla Aımuqasheva (62 kg) men Aıdana Súndetbaı (53 kg) qola medal oljalady.

15-18 aqpan aralyǵynda, AQSh memleketiniń Reno qalasynda US Open G2 atty jasóspirimder arasynda halyqaralyq týrnır ótti.

Bul synda Qajymuqan Muńaıtpasov atyndyǵa oqý-sporttyq ordasynyń taekvondoshysy  Erkin Álınur ulttyq qurama sapynda óner kórsetip, jeńimpaz atandy.

Velosport: Túrkııanyń Antalıa qalasynda ótken maýntınbaıktan Kuzilalan Cup (Qyzylalan kýbogi) jarysynda jerlesterimiz úzdikter qatarynan kórindi. Kross-kantrı baǵdarlamasynda Alına Sarkýlova taǵy top jaryp, 2-altyn medalin moınyna taqty. Ol bir kún burynǵy áıelder arasyndaǵy jarysta da jeńiske jetken edi. Sonymen qatar Ulttyq qurama sportshysy Tatıana Geneleva bir kúmis, bir qola medal ıelendi. Erler saıysynda Denıs Sergıenko kúmis júldeger atandy.

Jelkendi qaıyq: Qatardyń astanasy — Dohada uıymdastyrylǵan jelkendi qaıyq sportynan halyqaralyq regatada Qazaqstan quramasy 1 kúmis, 3 qola medal jeńip aldy. Zest sanatynda Karına Janǵazova 2-orynnan kórindi. Al Anton Gaas «lazer» sanatynda, Karına Janǵazova jekeleı synda, Berik Kýbaev pen Iana Belozerova juby «470» sanatynda úzdik úshtikti túıindedi.

Sporttyq gımnastıka: Kaırde (Mysyr) ótip jatqan 2024 jylǵy alǵashqy Álem kýbogi kezeńinde ulttyq qurama sportshysy Zeınolla Ydyrysov at snarıadyndaǵy jattyǵýda qola júldege ıe boldy. Ol 14.800 upaı jınap, Ahmad Ábý Ál-soýd (Iordanııa) jáne Hýr Ýntan (Ońtústik Koreıa) keıingi nátıje kórsetti.

Dzıýdo: Ulttyq qurama sportshysy Ábıba Ábýjaqynova Ázerbaıjan astanasy Bakýde ótken Grand Slam jarysynda qola medal jeńip aldy. Ol 48 kg deıingi salmaqta júlde jolynda Belgııa atleti Loıs Petıtten aılasyn asyrdy. Bul – Ábıbanyń bıylǵy álemdik dodalarda alǵan ekinshi júldesi.

Aýyr atletıka: Qostanaı qalasynda aýyr atletıkadan el chempıonatynyń kezekti jarys kúni erler 73 kg, áıelder 64 kg deıingi salmaqtaǵy úzdikterdi anyqtady.

Erler arasynda bas júlde úshin talas Álibek Rahymberdi men byltyrǵy jasóspirimder arasyndaǵy álem chempıony Erasyl Sáýlebekovtiń arasynda ótti. Búgin Álibektiń mereıi ústem tústi.

Erler, 73 kg:

1.Álibek Rahymberdi (Almaty qalasy) – 306 kg (131 kg+175 kg)

2.Erasyl Sáýlebekov (Qyzylorda oblysy) – 293 kg (128+165)

3.Beksultan Aıtbaı — (Qyzylorda oblysy) – 279 kg (119+160).

Jarys óte tartysty ótti. Qarsylasymnyń bári jeńiske jetýdi qalaǵany sezildi. Nátıjeme kóńilim tolady. Bıylǵy josparym – jastar arasyndaǵy álem chempıonatynda jeńiske jetý, — dedi Álibek Rahymberdi.

Áıelder arasynda Rıo Olımpıadasynyń qola júldegeri Karına Gorıcheva jaqsy óner kórsetip, myqtylyǵyn pash etti.

Áıelder, 64 kg:

1.Karına Gorıcheva (Jetisý oblysy) – 198 kg (90+108)

2.Aıǵanym Janbolat (Almaty oblysy) – 190 kg (85+105)

3.Kıra Danılova (Aqmola oblysy) – 185 kg (84+101).

Júlde úshin tartysty jarys boldy. Izimizdi basyp, ósip kele jatqan jastardyń deńgeıi kózge kórinip tur. Men úshin bıylǵy basty jarys jeltoqsanda ótetin álem chempıonaty. Kele Olımpıadaǵa deıin sportta qalam ba degen suraqqa kelsek, ózimdi áli tyń sezinem. О́zime senimdimin, alǵa qoıǵan maqsatym bar, — dedi Karına Gorıcheva.

Short-trek: Nıderland elinde (Herenven qalasy) short-trek sport túrinen jastar arasynda ótip jatqan Álem kýbogynyń III kezeńinde Qazaqstan sportshylary kúmis medalǵa ıe boldy. Qyzdar arasynda 3 000 metrge estafetalyq jarysta ulttyq qurama komandasynyń «tórttigi» ekinshi orynǵa turaqtady.

Qajymuqan Muńaıtpasov atyndaǵy mektep-ınternat-kolledjdiń oqýshy-sportshylary Polına Omelchýk pen Anastasııa Astrahaneva álemdik júldeni jeńip alýǵa qomaqty úlesterin qosty.

Esterińizge salsaq, Polına Omelchýk jýyrda Ońtústik Koreıada (Kangvon qalasy) jasóspirimder arasynda ótken IV qysqy Olımpııalyq oıyndardyń qola júldegeri atanǵan bolatyn.

 

Týrızm jáne sport mınıstrliginiń materıaldary negizinde ázirlendi