گەننادي گولوۆكين ۇوك پرەزيدەنتى بولىپ سايلاندى (ۆيدەو)

كاسىپقوي بوكستان ورتا سالماقتاعى الەمنىڭ ەكس-چەمپيونى گەننادي گولوۆكين ۇلتتىق وليمپيادا كوميتەتىنىڭ پرەزيدەنتى بولىپ سايلاندى.

قوعامدىق بىرلەستىكتىڭ باسشىسىن سايلاۋ جابىق ەسىك جاعدايىندا بولدى. وعان باق شاقىرىلمادى.

بۇگىن استانادا قازاقستان ۇلتتىق وليمپيادالىق كوميتەتى باس اسسامبلەياسىنىڭ كەزەكتەن تىس وتىرىسىندا ۇيىمنىڭ پرەزيدەنتى مەن باسقا دا باسقارۋ ورگاندارىنىڭ سايلاۋى بولدى.

ۇيىمدى 2015 جىلدان بەرى باسقارعان تيمۋر ق ۇلىباەۆ ءوز وكىلەتتىگىن اياقتادى.

قازاقستان ۇوك جاڭا باسشىسى بولىپ گەننادي گولوۆكين سايلاندى. باس اسسامبلەيا مۇشەلەرى ونىڭ كانديداتۋراسىن ءبىر اۋىزدان قولدادى، — دەلىنگەن ۇوك حابارلاماسىندا.

ۇوك جاڭا پرەزيدەنتى باس اسسامبلەيانىڭ كەزەكتەن تىس وتىرىسىندا ءسوز سويلەپ، ءوز ويىن ايتتى.

جاڭا لاۋازىمدا ەلگە قىزمەت ەتۋ — مەن ءۇشىن زور مارتەبە. ماعان قازاقستان ۇلتتىق وليمپيادالىق كوميتەتىن باسقارۋدى ۇسىنعاندا، قازاقستان سپورتتى دامىتۋعا ءوز ۇلەسىمدى قوسۋعا مۇمكىندىك بەرسە عانا، كانديداتۋرامدى ۇسىناتىنىمدى ايتتىم.

وزدەرىڭىز بىلەتىندەي، مەن ساياساتكەر دە، شەنەۋنىك تە ەمەسپىن. ءوز ءىسىمدى سوزبەن ەمەس، ىسپەن دالەلدەپ ۇيرەنگەنمىن.

وسى ورايدا، مەنىڭ ءوز كوزقاراسىم، جىلدار بويى جينالعان حالىقارالىق تاجىريبەم مەن كوماندامنىڭ بارىن ايتقىم كەلەدى. ال ەڭ باستىسى جانە مەنىڭ كوپتەن بەرگى قالاۋىم – بۇل بارلىعىن دا ءوزىمنىڭ تۋعان ەلىمدە ىسكە اسىرۋ، — دەدى گولوۆكين.

بىلتىر گەننادي گولوۆكين رەسمي تۇردە IBO تۇجىرىمى بويىنشا ورتا سالماقتاعى الەم چەمپيونى اتاعىنان باس تارتتى. بۇل ونىڭ وسى كەزگە دەيىن بولعان سوڭعى اتاعى ەدى.

IBO پرەزيدەنتى ەد لەۆين گولوۆكيننىڭ الەم چەمپيونى اتاعىنان باس تارتقاننان كەيىن ورتا سالماقتاعى اتاق ءۇشىن باسقا بوكسشىلاردىڭ جەكپە-جەگىنە رۇقسات بەرىلەتىنىن ايتتى.

بۇعان دەيىن گەننادي گولوۆكين WBA Super جانە IBF چەمپيوندىق بەلبەۋلەرىنەن باس تارتقان بولاتىن. ەندى ونىڭ الەم چەمپيونى دەگەن اتاعى قالمادى.

GGG سوڭعى رەت شارشى الاڭعا 2022 جىلدىڭ كۇزىندە شىققان ەدى. سول كەزدە ول ساۋل «كانەلو» الۆارەسكە (59-2-2، 39 كو) قارسى جەكپە-جەك وتكىزىپ، تورەشىلەر ءبىراۋىزدان جەڭىستى مەكسيكالىق بوكسشىنىڭ ەنشىسىنە جازدى.

داستان كەنجالين،

استانا