Gennadıı Golovkın UOK prezıdenti bolyp saılandy (VIDEO)

Kásipqoı bokstan orta salmaqtaǵy álemniń eks-chempıony Gennadıı Golovkın Ulttyq Olımpıada komıtetiniń prezıdenti bolyp saılandy.

Qoǵamdyq birlestiktiń basshysyn saılaý jabyq esik jaǵdaıynda boldy. Oǵan BAQ shaqyrylmady.

Búgin Astanada Qazaqstan Ulttyq Olımpıadalyq komıteti Bas Assambleıasynyń kezekten tys otyrysynda uıymnyń prezıdenti men basqa da basqarý organdarynyń saılaýy boldy.

Uıymdy 2015 jyldan beri basqarǵan Tımýr Qulybaev óz ókilettigin aıaqtady.

Qazaqstan UOK jańa basshysy bolyp Gennadıı Golovkın saılandy. Bas Assambleıa músheleri onyń kandıdatýrasyn bir aýyzdan qoldady, — delingen UOK habarlamasynda.

UOK jańa prezıdenti Bas Assambleıanyń kezekten tys otyrysynda sóz sóılep, óz oıyn aıtty.

Jańa laýazymda elge qyzmet etý — men úshin zor mártebe. Maǵan Qazaqstan Ulttyq Olımpıadalyq komıtetin basqarýdy usynǵanda, Qazaqstan sportty damytýǵa óz úlesimdi qosýǵa múmkindik berse ǵana, kandıdatýramdy usynatynymdy aıttym.

О́zderińiz biletindeı, men saıasatker de, sheneýnik te emespin. О́z isimdi sózben emes, ispen dáleldep úırengenmin.

Osy oraıda, meniń óz kózqarasym, jyldar boıy jınalǵan halyqaralyq tájirıbem men komandamnyń baryn aıtqym keledi. Al eń bastysy jáne meniń kópten bergi qalaýym – bul barlyǵyn da ózimniń týǵan elimde iske asyrý, — dedi Golovkın.

Byltyr Gennadıı Golovkın resmı túrde IBO tujyrymy boıynsha orta salmaqtaǵy álem chempıony ataǵynan bas tartty. Bul onyń osy kezge deıin bolǵan sońǵy ataǵy edi.

IBO prezıdenti Ed Levın Golovkınniń álem chempıony ataǵynan bas tartqannan keıin orta salmaqtaǵy ataq úshin basqa boksshylardyń jekpe-jegine ruqsat beriletinin aıtty.

Buǵan deıin Gennadıı Golovkın WBA Super jáne IBF chempıondyq belbeýlerinen bas tartqan bolatyn. Endi onyń álem chempıony degen ataǵy qalmady.

GGG sońǵy ret sharshy alańǵa 2022 jyldyń kúzinde shyqqan edi. Sol kezde ol Saýl «Kanelo» Alvareske (59-2-2, 39 KO) qarsy jekpe-jek ótkizip, tóreshiler biraýyzdan jeńisti meksıkalyq boksshynyń enshisine jazdy.

Dastan KENJALIN,

ASTANA