Олимпиада чемпионы Владимир Смирнов жеке заттарын музейге тапсырды

Еліміз тәуелсіздігін жариялап, қысқы спорттан Олимпиадаға алғаш рет қатысқан кезде Олимпиада чемпионы атанған шаңғышы Владимир Президент орталығындағы Қазақстан спортының Даңқ музейіне жеке заттарын тарту етті.

Ол 1994 жылы Норвегияның Лиллехаммер қаласында өткен XVII қысқы Олимпиадада 50 шақырымдық(классикалық стиль) жарыста чемпион атанған еді.

Бұл біздің егемен ел ретінде барған алғашқы Олимпиялық ойындарымыз, бірінші алтын жүлдеміз болатын. Өзімді сол үшін мақтан тұтамын. Содан бері арада 30 жыл өтіпті.

Щучье қаласында арнайы іс-шара болдв. Мектеп оқушылары маған жылы лебізін айтып, зор қуаныш сыйлады. Осы музейге келушілер көп болғанын қалаймын. Біздің заттарымыз арқылы олар сол жарыс жайлы көбірек біле алады, — деді Олимпиада чемпионы.

Қазір Қазақстан спортының Даңқ музейінде Серік Сәпиевтің Лондон Олимпиадасындағы былғары қолғабы, Александр Винокуровтың жейдесі мен велосипеді, Дмитрий Баландиннің Рио Олимпиадасындағы спорт киімі, Дәулет Тұрлыхановтың медальдары, Денис Теннің Сочи Олимпиадасындағы костюмі, Данияр Елеусіновтің шлемі мен киімі, Геннадий Головкиннің алтын белбеулері мен басқа да заттар қойылған.

Дастан КЕНЖАЛИН,

АСТАНА