قازاقستان قۇراماسى «بولاشاق ويىندارىن» وتكىزۋ تاجىريبەسىن زەرتتەپ جاتىر

تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى مەن قازاقستان كيبەرسپورت فەدەراتسياسىنىڭ دەلەگاتسياسى رەسەيدىڭ قازان قالاسىندا ءوتىپ جاتقان ءى «بولاشاق ويىندارىنا» جۇمىس ساپارىمەن باردى.

ولار ءىس-ساپاردا ويىنداردىڭ باسىم بولىگىن قابىلداعان «قازان ەكسپو» ورتالىعىن ارالادى. مۇندا ارەنانىڭ ۇيىمداستىرۋ جانە تەحنولوگيا مۇمكىندىكتەرىمەن تانىسىپ، حالىقارالىق بايقاۋشىلار كومانداسىنا ارنالعان پرەزەنتاتسياعا قاتىستى. سپيكەرلەر اراسىندا حالىقارالىق حوككەي فەدەراتسياسىنىڭ بۇرىنعى پرەزيدەنتى رەنە فازەل بار. ول قازىر ويىنداردىڭ ەلشىسىنىڭ ءبىرى. فيدجيتال (سپورتتىق جانە تسيفرلىق شەشىمدەر) پىشىنىندە ءوتىپ جاتقان تاريحتاعى العاشقى حالىقارالىق مۋلتيسپورت ءتۋرنيرىن ۇيىمداستىرۋشىلار قازاقستان دەلەگاتسياسىنا جارىستىڭ قىر-سىرىن ەگجەي-تەگجەيلى ايتىپ بەردى.

قازىر تاتارستان استاناسىنا الەمنىڭ 104 ەلىنەن بارلىعى 260 كوماندا (2000-نان استام سپورتشى) جينالدى. جارىس 5 توپقا نەمەسە سپورت، ستراتەگيا، تاكتيكا، تەحنولوگيا، جىلدامدىق سىن-قاتەرلەرى سىندى بولىمگە كىرەتىن 21 باعدارلاما بويىنشا جالعاسىپ جاتىر.  قازاقستاننىڭ 48 وكىلى 13 سايىسقا قاتىسۋدا. ولار Dota2، فيدجيتال-حوككەي، فيدجيتال-فۋتبول، فيدجيتال-باسكەتبول، دروندار جارىسى، روبوتتار شايقاسى، Warface جانە باسقا دا سايستاردا باق سىناپ جاتىر.

قازاقستاننىڭ xgod كومانداسى Counter-Strike 2 جانە لازەرلىك تەگ بويىنشا جەڭىمپاز اتاندى.

ءبىزدىڭ ويىنشىلار بۇعان دەيىن Counter-Strike بويىنشا ءتۇرلى جارىستاردا جەڭىسكە جەتكەن. بۇل جەتىستىك كەزدەيسوق ەمەس، بولاشاقتا جاڭا جەڭىستەرگە ۇمىتتەنەمىز، — دەدى كيبەرسپورت فەدەراتسياسىنىڭ سپورت ديرەكتورى داستان كارىم.

ەسكە سالا كەتسەك، 21 اقپاندا قازاندا وتكەن ويىنداردىڭ اشىلۋى ءراسىمى اياسىندا قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينگە ەلىمىزدە وسىنداي جارىس وتكىزۋدى ۇسىنعان بولاتىن.

داستان كەنجالين،

استانا