Kúresten ACh: Qazaqstan áıelder quramasy tórt qola júldeni ıelendi

Kúres túrlerinen Qyrǵyzstannyń astanasy — Bishkekte ótip jatqan Azııa chempıonatynda áıelder arasynda barlyq salmaqtaǵy úzdikter anyqtaldy, dep habarlady Týrızm jáne sport mınıstrliginiń Sportty damytý dırekııasy.

Keshe sportshylar qalǵan bes salmaqta synǵa tústi. Ulttyq quramanyń sportshylary sonyń ekeýinde júldeni jeńip aldy.

Anastasııa Panasovıch 72 kg deıingi salmaqta qola medal úshin kúreste ózbekstandyq Ozoda Zarıpboevany taza jeńdi. Sonymen qatar Laýra Almaǵanbetova úshinshi oryn úshin beldesýde (57 kg) qyrǵyzstandyq Sezim Jumanazarovadan aılasyn asyrdy.

Osylaısha, Qazaqstan áıelder quramasy Azııa chempıonatyn tórt qola medalmen aıaqtady. Keshe Dıana Kaıýmova (59 kg) men Elmıra Syzdyqova (76 kg) qola júlde alǵan bolatyn.