بوكسشىلار ءداستۇرلى تۋرنيردە شارشى الاڭنىڭ شاڭىن قاقتى (فوتو)

ساعادات نۇرماعامبەتوۆتى ەسكە الۋعا ارنالعان بوكستان وتكەن حالىقارالىق ءتۋرنيردىڭ جەڭىمپازدارى انىقتالدى، دەپ حابارلادى قورعانىس مينيسترلىگى.

حالىقارالىق تۋرنيرگە ارمەنيا، ازەربايجان، قازاقستان، قىرعىزستان، تاجىكستان، تۇرىكمەنستان مەن وزبەكستاننان كەلگەن 150 بىلعارى قولعاپ شەبەرى قاتىستى.

كەڭەس وداعىنىڭ باتىرى، № 1 حالىق قاھارمانى، قازاقستاننىڭ ءبىرىنشى قورعانىس ءمينيسترى، ارميا گەنەرالى ساعادات نۇرماعامبەتوۆتى ەسكە الۋعا ارنالعان ءتۋرنيردى قورعانىس مينيسترلىگىنىڭ سپورت كوميتەتى ۇيىمداستىردى.

جەڭىمپازدار مەن جۇلدەگەرلەردى ماراپاتتاۋ راسىمىنە قورعانىس مينيسترلىگىنىڭ اپپارات باسشىسى پولكوۆنيك رۋسلانبەك بەكجىگىتوۆ پەن قورعانىس مينيسترلىگى سپورت كوميتەتىنىڭ توراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ قاتىستى.

بۇل قازاقستاننىڭ قارۋلى كۇشتەرىن قۇرۋدىڭ باستاۋىندا تۇرعان جانە بار ءومىرىن وتانعا ادال قىزمەت ەتۋگە ارناعان اتى اڭىزعا اينالعان اسكەري قولباسشى ساعادات نۇرماعامبەتوۆتىڭ قۇرمەتىنە ارنالعان 27-تۋرنير. سەندەردىڭ سپورتتاعى جولدارىڭ دا قۇرمەتكە لايىق. شىنىندا سپورتتاعى جەتىستىكتەر – بۇل تىنىمسىز جاتتىعۋلاردىڭ، وراسان زور ەڭبەك پەن تاباندىلىقتىڭ ناتيجەسى. الار اسۋلارىڭ كوپ بولسىن. بيىك بەلەستەر مەن جاڭا جەڭىستەر تىلەيمىن، – دەدى رۋسلانبەك بەكجىگىتوۆ.

قورعانىس مينيسترلىگى سپورت كوميتەتىنىڭ توراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ اتاپ وتكەندەي، مۇنداي جارىستاردا ەلىمىزدىڭ ەڭ مىقتى بوكسشىلارى ىرىكتەلەدى، شەبەرلىك شىڭدالىپ، تاجىريبە جيناقتالادى.

جارىستىڭ سوڭعى كۇنى ەرەكشە تارتىستى ءارى اسەرلى ءوتتى. تورەشىلىك تە ءادىل بولدى. تۋرنير جوعارى دەڭگەيدە ۇيىمداستىرىلدى. سپورتشىلاردى قولداعان بارلىق قوناقتار مەن كورەرمەندەرگە العىسىمدى بىلدىرگىم كەلەدى، – دەدى ورتالىق سپورت كلۋبىنىڭ باستىعى.

سپورتشىلاردىڭ ونەرلەرى 13 سالماق دارەجەسى بويىنشا باعالاندى. جەكەلەي ەسەپتە جەڭىمپازدار كەلەسى سالماقتار بويىنشا انىقتالدى: 48 كەلىگە دەيىنگى سالماقتا – نۇرزات وڭعاروۆ (جامبىل وبلىسى)، 51 كەلىگە دەيىن – سۇلەيمەن تولەپبەرگەن (شىمكەنت ق.)، 54 كەلىگە دەيىن – اقىلتاي راباتوۆ (الماتى وبلىسى)، 57 كەلىگە دەيىن – باعلان كەنجەبەكوۆ (جامبىل وبلىسى)، 60 كەلىگە دەيىن – اكمال ۋبايدوۆ (تاجىكستان)، 63،5 كەلىگە دەيىن – ومار ليۆازا (قىرعىزستان)، 67 كەلىگە دەيىن – ناكوبكوحان حارۋتۋن (ارمەنيا)، 71 كەلىگە دەيىن – امانگەلدى نۇرجان (جامبىل وبلىسى)، 75 كەلىگە دەيىن – فارۋح توقتاسىنوۆ (وسك)، 80 كەلىگە دەيىن – نۇرسۇلتان بەيسەمباەۆ (الماتى وبلىسى)، 86 كەلىگە دەيىن – ەركەبۇلان اكىمباي (الماتى وبلىسى)، 92 كەلىگە دەيىن – پارۆيز كارىموۆ (تاجىكستان) جانە 92 كەلىدەن جوعارى – نۇرسۇلتان امانجولوۆ (جامبىل وبلىسى).