Boksshylar dástúrli týrnırde sharshy alańnyń shańyn qaqty (FOTO)

Saǵadat Nurmaǵambetovti eske alýǵa arnalǵan bokstan ótken halyqaralyq týrnırdiń jeńimpazdary anyqtaldy, dep habarlady Qorǵanys mınıstrligi.

Halyqaralyq týrnırge Armenııa, Ázerbaıjan, Qazaqstan, Qyrǵyzstan, Tájikstan, Túrikmenstan men О́zbekstannan kelgen 150 bylǵary qolǵap sheberi qatysty.

Keńes Odaǵynyń Batyry, № 1 Halyq qaharmany, Qazaqstannyń birinshi qorǵanys mınıstri, armııa generaly Saǵadat Nurmaǵambetovti eske alýǵa arnalǵan týrnırdi Qorǵanys mınıstrliginiń Sport komıteti uıymdastyrdy.

Jeńimpazdar men júldegerlerdi marapattaý rásimine Qorǵanys mınıstrliginiń Apparat basshysy polkovnık Rýslanbek Bekjigitov pen Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov qatysty.

Bul Qazaqstannyń Qarýly kúshterin qurýdyń bastaýynda turǵan jáne bar ómirin Otanǵa adal qyzmet etýge arnaǵan aty ańyzǵa aınalǵan áskerı qolbasshy Saǵadat Nurmaǵambetovtiń qurmetine arnalǵan 27-týrnır. Senderdiń sporttaǵy joldaryń da qurmetke laıyq. Shynynda sporttaǵy jetistikter – bul tynymsyz jattyǵýlardyń, orasan zor eńbek pen tabandylyqtyń nátıjesi. Alar asýlaryń kóp bolsyn. Bıik belester men jańa jeńister tileımin, – dedi Rýslanbek Bekjigitov.

Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov atap ótkendeı, mundaı jarystarda elimizdiń eń myqty boksshylary irikteledi, sheberlik shyńdalyp, tájirıbe jınaqtalady.

Jarystyń sońǵy kúni erekshe tartysty ári áserli ótti. Tóreshilik te ádil boldy. Týrnır joǵary deńgeıde uıymdastyryldy. Sportshylardy qoldaǵan barlyq qonaqtar men kórermenderge alǵysymdy bildirgim keledi, – dedi Ortalyq sport klýbynyń bastyǵy.

Sportshylardyń ónerleri 13 salmaq dárejesi boıynsha baǵalandy. Jekeleı esepte jeńimpazdar kelesi salmaqtar boıynsha anyqtaldy: 48 kelige deıingi salmaqta – Nurzat Ońǵarov (Jambyl oblysy), 51 kelige deıin – Súleımen Tólepbergen (Shymkent q.), 54 kelige deıin – Aqyltaı Rabatov (Almaty oblysy), 57 kelige deıin – Baǵlan Kenjebekov (Jambyl oblysy), 60 kelige deıin – Akmal Ýbaıdov (Tájikstan), 63,5 kelige deıin – Omar Lıvaza (Qyrǵyzstan), 67 kelige deıin – Nakobkohan Harýtýn (Armenııa), 71 kelige deıin – Amangeldi Nurjan (Jambyl oblysy), 75 kelige deıin – Farýh Toqtasynov (OSK), 80 kelige deıin – Nursultan Beısembaev (Almaty oblysy), 86 kelige deıin – Erkebulan Ákimbaı (Almaty oblysy), 92 kelige deıin – Parvız Kárimov (Tájikstan) jáne 92 keliden joǵary – Nursultan Amanjolov (Jambyl oblysy).