تورەحان سابىرحان جاستار اراسىندا الەم چەمپيونى اتاندى

بوكستان بۋدۆا (مونتەنەگرو) قالاسىندا ءوتىپ جاتقان جاستار اراسىنداعى الەم چەمپيوناتىندا ەل قورجىنىنا العاشقى التىن جۇلدە ءتۇستى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

اتاپ ايتساق، 67 كگ سالماقتا تورەحان سابىرحان فينالداعى جەكپە-جەكتە كۋبا بوكسشىسى دەۆيد ەسپينوسانى 4:1 ەسەبىمەن جەڭدى. ەكى بوكسشى بيىل ناۋرىز ايىندا جاستار اراسىندا وتكەن الەم كۋبوگىندا دا كەزدەسىپ، وتاداسىمىز باسىم تۇسكەن ەدى. وسى جولى دا سابىرحان بوستاندىق ەلىنىڭ بوكسشىسىنان ايلاسىن اسىردى.

تورەحان سابىرحاننىڭ بيىلعى جىلى قاتىسقان جارىستارى:

التىن مەدال – جاستار اراسىندا الەم چەمپيوناتى

التىن جۇلدە – «ەۋرازيا كۋبوگى» حالىقارالىق ءتۋرنيرى

التىن مەدال – مۇحتارحان دىلدابەكوۆتىڭ جۇلدەسى ءۇشىن حالىقارالىق تۋرنير

التىن جۇلدە – جاستار اراسىندا ازيا چەمپيوناتى

التىن مەدال – جاستار اراسىندا الەم كۋبوگى

وسىلايشا، پاريج وليمپياداسىنا بارۋعا ءۇمىتتى بولعان تورەحان سابىرحان جاستار ساناتىندا ادەمى نۇكتە قويدى.