Рыбакина WTA 1000 турнирінің ширек финалына шықты

Әлемнің жетінші ракеткасы Елена Рыбакина Дубайда (БАӘ) өтіп жатқан WTA 1000 турнирін сәтті бастады, деп хабарлады Қазақстан теннис федерациясы.

Ол жарысты екінші айналымнан бастап, әлем рейтингінде 62-орында тұрған жапониялық Моюки Утидзиманы 6:3, 6:2 есебімен жеңді. Осыдан кейін үшінші айналымда Испанияның өкілі Паула Бадосадан (10 WTA) басым түсті.

Рыбакина 4:6, 7:6 (10:8), 7:6 (7:2) есебімен жеңіске жетті. Ол екінші сеттегі тай-брейкте 3:6 есебімен жеңіліп жатқан еді. Алайда төрт матч-болда басым түсіп, 10:8 есебімен жеңіп шықты. Қарсыластардың өзара кездесулеріндегі есеп 4:4 болды.

Ертең Рыбакина америкалық София Кенинмен күш сынасады. Ол осы турнирдің өткен жылғы чемпионы италиялық Жасмин Паолиниді жеңген еді.