«رولان گارروس»: بۋبليك تۇڭعىش رەت ءتورتىنشى اينالىمعا شىقتى

قازاقستاننىڭ ءبىرىنشى، الەمنىڭ 62-راكەتكاسى الەكساندر بۋبليك «رولان گارروس» ءتۋرنيرىنىڭ ءتورتىنشى اينالىمىنا شىقتى، دەپ حابارلادى قازاقستان تەننيس فەدەراتسياسى.

ول دۇنيەجۇزىلىك رەيتينگىدە 200-ورىندا تۇرعان 21 جاستاعى پورتۋگاليالىق ەنريكە روشامەن ويناپ، قارسىلاسىن 6:1، 7:5، 6:2 ەسەبىمەن وڭاي جەڭدى.

ءبىر ساعات 41 مينۋتقا سوزىلعان ماتچتا بۋبليك 9 ەيسپەن بىرگە 11 برەيك-پوينتتىڭ بەسەۋىن پايدالاندى.

وسىلايشا، توپىراق توسەنىشىندەگى كورتتا ويناۋدى ونشا قۇپ كورمەيتىن بۋبليك بيىل ءساتتى ونەر كورسەتىپ، العاش رەت «رولان گارروس» ءتۋرنيرىنىڭ ءتورتىنشى اينالىمىنا جولداما الدى.

ەندى الەكساندر بۋبليك شيرەك فينالعا شىعۋ ءۇشىن الەمنىڭ 5-راكەتكاسى، ۇلىبريتانيالىق دجەك درەيپەرمەن وينايدى.