قازاقستان سپورتتىق گيمناستيكادان ازيا چەمپيوناتىندا قولا مەدال جەڭىپ الدى

وڭتۇستىك كورەيانىڭ چەچحون قالاسىندا ءوتىپ جاتقان ازيا چەمپيوناتىندا قازاقستان ەرلەر قۇراماسى سپورتتىق گيمناستيكادان كوماندالىق كوپسايىستا قولا جۇلدەگەر اتاعىنا يە بولدى.

بۇل جۇلدەنى ناريمان كۋربانوۆ، ميلاد كاريمي، دميتري پاتانين، رومان مامەنوۆ، ءىلياس ءازىزوۆ پەن الىشەر تويبازاروۆ جەڭىپ الدى. ولار جالپى 240.301 ۇپاي جينادى.

ۇلتتىق وليمپيالىق كوميتەتتىڭ حابارلاۋىنشا، ءبىرىنشى ورىندى جاپونيا قۇراماسى (253.002 ۇپاي)، ەكىنشى ورىندى قىتاي قۇراماسى (248.265 ۇپاي)، ءۇشىنشى ورىندى قازاقستان  (240.301 ۇپاي) يەلەندى. سونىمەن بىرگە ءتورتىنشى ساتىعا وڭتۇستىك كورەيا (240.101 ۇپاي)، بەسىنشى ساتىعا قىتايدىڭ تايپەيى (236.534 ۇپاي) كوتەرىلدى.

كوماندالىق سايىستا ەرلەر كومانداسى ەكى جىل بۇرىنعى ناتيجەسىن قايتالادى.

قازاقستان قۇراماسى بۇعان دەيىن 2023 جىلى سينگاپۋردە وتكەن  قۇرلىقتىق جارىستا جۇلدەگە يە بولعان ەدى. ول كەزدە ناريمان كۋربانوۆ، ميلاد كاريمي، دميتري پاتانين، دياس تويشىبەك، الىشەر تويبازاروۆ پەن ءىلياس ازيزوۆ تۇعىرعا كوتەرىلدى.

داستان كەنجالين،

استانا