Qazaqstan sporttyq gımnastıkadan Azııa chempıonatynda qola medal jeńip aldy

Ońtústik Koreıanyń Chechhon qalasynda ótip jatqan Azııa chempıonatynda Qazaqstan erler quramasy sporttyq gımnastıkadan komandalyq kópsaıysta qola júldeger ataǵyna ıe boldy.

Bul júldeni Narıman Kýrbanov, Mılad Karımı, Dmıtrıı Patanın, Roman Mamenov, Ilııas Ázizov pen Álisher Toıbazarov jeńip aldy. Olar jalpy 240.301 upaı jınady.

Ulttyq Olımpııalyq komıtettiń habarlaýynsha, birinshi oryndy Japonııa quramasy (253.002 upaı), ekinshi oryndy Qytaı quramasy (248.265 upaı), úshinshi oryndy Qazaqstan  (240.301 upaı) ıelendi. Sonymen birge tórtinshi satyǵa Ońtústik Koreıa (240.101 upaı), besinshi satyǵa Qytaıdyń Taıpeıi (236.534 upaı) kóterildi.

Komandalyq saıysta erler komandasy eki jyl burynǵy nátıjesin qaıtalady.

Qazaqstan quramasy buǵan deıin 2023 jyly Sıngapýrde ótken  qurlyqtyq jarysta júldege ıe bolǵan edi. Ol kezde Narıman Kýrbanov, Mılad Karımı, Dmıtrıı Patanın, Dııas Toıshybek, Álisher Toıbazarov pen Ilııas Azızov tuǵyrǵa kóterildi.

Dastan KENJALIN,

ASTANA