تاعى ءبىر التىن جۇلدە! قازاقستان سپورتتىق گيمناستيكادان ۇزدىك ناتيجە كورسەتتى

وڭتۇستىك كورەيانىڭ چەچحون قالاسىندا سپورتتىق گيمناستيكادان ءوتىپ جاتقان ازيا چەمپيوناتىندا ەلىمىزدىڭ قورجىنى تاعى ءبىر التىن مەدال جانە كۇمىس جۇلدەمەن تولىقتى.

ازيا چەمپيوناتىندا قازاقستان جاسوسپىرىمدەرى فينالدىق جارىستا ءۇش مەدال جەڭىپ الدى.

رومان حەگاي مەن نۇرتان ىدىرىسوۆ ات سناريادىنداعى جاتتىعۋدا ونەر كورسەتتى. حەگاي تورەشىلەردىڭ شەشىمىمەن 13.800 ۇپاي جيناسا، ىدىرىسوۆ 12.866 ۇپايدى قالتاسىنا باستى. ءۇشىنشى ورىندى جاپونيالىق حارۋتوشي وچاي 12.666 ۇپايمەن الدى.

سونىمەن بىرگە ىدىرىسوۆ قوسسىرىقتاعى جاتتىعۋلاردا ەڭ ۇزدىك ناتيجە كورسەتىپ، 13.933 ۇپايعا يە بولدى.

جاسوسپىرىمدەر قۇراماسى كوماندالىق كوپسايىستا ءۇشىنشى ورىن الدى.

بۇعان دەيىن ىدىرىسوۆ ەركىن جاتتىعۋدىڭ فينالىندا ونەر كورسەتىپ، سەگىزىنشى ورىنعا (11.000 بالل) شىققان ەدى.

جەكەلەي سىنداعى فينالدار ءالى جالعاسىپ جاتىر.

داستان كەنجالين،

استانا