قازاقستان — سولتۇستىك ماكەدونيا. قاتەلىك كوماندانى كەشىرمەيدى

بۇگىن فۋتبولدان قازاقستان ۇلتتىق قۇراماسى 2026 جىلعى الەم چەمپيوناتى ىرىكتەۋ تۋرنيرىندە تاعى ءبىر قارسىلاسىنان جەڭىلدى. بۇل جولى كوماندا سولتۇستىك ماكەدونيا جاساعىمەن ويناپ،  ءوز الاڭىندا 0:1 ەسەبىمەن ەسە جىبەردى.

جالپى، ماتچ اسا تارتىستى جانە قىزىقتى بولدى. بۇل ويىندا وتانداستارىمىزدىڭ جەڭىس ءۇشىن قولدا بار مۇمكىندىكتىڭ ءبارىن جاسادى. ويىن باستالىسىمەن ۇلتتىق قۇراما قارسىلاستاردىڭ قاقپاسىن اڭدىپ، قاۋىپتى سوققىلار جاساپ، ەسەپتى ءبىرىنشى بولىپ اشۋعا تىرىستى.

ءبىرىنشى تايمدا ۇلتتىق قۇرامانىڭ جارتىلاي قورعاۋشىسى عالىمجان كەنجەبەك جاقسى ويىن ورنەگىمەن كوزگە ءتۇستى. ول الاڭدا ويىندى جاقسى كورە ءبىلىپ، جاقسى اشىلىپ، كوماندالاستارىنا ادەمى پاس بەرىپ وتىردى. الايدا، دوپ تورعا تۇسپەي، ۇلتتىق قۇراما ماقساتىنا جەتە الماي جاتتى. كەرىسىنشە، ءبىرىنشى تايمدا سولتۇستىك ماكەدونيا جاساعىنىڭ جولى بولىپ كەتتى. قوناقتار ساپىنداعى الەكساندار ترايكوۆسكي 33-مينۋتتا مۇحامەدجان سەيسەن قورعاعان قاقپانى ءدال كوزدەپ، تابلوداعى ەسەپتى وزگەرتتى.

ەكىنشى تايمدا الاڭ يەلەرى ەسەپتى تەڭەستىرۋگە تىرىستى. ويىننىڭ سوڭىندا داستان ساتپاەۆ، اليار مۇحاممەد، الەكساندر زۋەۆ الاڭعا شىقتى. وسىلاردىڭ ىشىندە ساتپاەۆتىڭ گول سالۋعا مۇمكىندىگى بولدى. ول قاقپانى 40 مەتردەن كوزدەگەندە ونىڭ دوبى باعانعا ءتيىپ، گول بولا جازدادى. مۇنىڭ الدىندا ءبىر دوپ ماكەدونيا قاقپاسىنىڭ ماڭدايشاسىنا ءتيىپ، كەرى قايتقان بولاتىن.

ءبىر وكىنىشتىسى، وتانداستارىمىز ويىننىڭ سوڭىنا دەيىن قانشا ۇمتىلسا دا ەش ناتيجە شىعارا الماي كەتتى. بۇل ماتچتا قازاقستان قۇرامىندا گول سالا الاتىن بىردە-ءبىر ويىنشى بولعان جوق. جالپى، قۇرامادا ينتۋيتسياسى بار، الاڭدا گولدى سەزە بىلەتىن شابۋىلشى جوق. ونىڭ ۇستىنە الاڭنىڭ ورتاسى ۇنەمى بوس قالا بەرەدى. ويىنشىلار كەيدە دوپتى شامادان كوپ ۋاقىت ۇستاپ، پاستى كىمگە بەرەرىن بىلمەي قالىپ تا جاتادى. ماكەدونيانىڭ بۇگىنگى گولى دا قازاقستان ويىنشىلارىنىڭ كەسىرىنەن بولدى. ەگەر اسحات تاعىبەرگەن پاستى الاڭنىڭ ورتاسىندا تۇرعان نۇرالى الىپكە بەرمەگەندە گول دا بولمايتىن ەدى دەپ ويلايسىڭ. ال نۇرالى ءالىپتىڭ قاتەلىگى ول پاستى دۇرىس قابىلداي المادى. ماكەدونيانىڭ ويىنشىلارى وسى مۇمكىندىكتى ءتيىمدى پايدالانىپ، قاقپانى ءدال كوزدەپ، گول سالىپ كەتتى. وسىلايشا، قازاقستان قۇراماسى 0:1 ەسەبىمەن ەسە جىبەردى. ال ماكەدونيا بولسا، وسىمەن سوڭعى 11 ويىندا جەڭىلمەي، ۇيلەرىنە قايتتى.

ماتچتان كەيىن قازاقستان قۇراماسىنىڭ باس جاتتىقتىرۋشىسى ءالي اليەۆ سولتۇستىك ماكەدونيامەن ويىنعا قاتىستى ويىن ايتتى.

ءبىزدى قولداۋعا كەلگەن بارلىق جانكۇيەرلەرگە العىس ايتامىن. جىگىتتەرگە مىڭ العىس، ولار بۇل ماتچقا تىڭعىلىقتى دايىندالىپ، الاڭدا بارىن سالدى. ءبىز ەل ءۇشىن، تۋ ءۇشىن سوڭىنا دەيىن كۇرەسەمىز دەپ ۋادە بەرگەنبىز. بۇگىن جانكۇيەرلەر تارتىسقا تولى، جاندى كۇرەستى كوردى دەپ ويلايمىن. ويىن الاڭىنىڭ ءار بولىگىندە شىنايى شايقاس بولدى.

بۇگىن بىزگە ساتتىلىك جولداس بولمادى. داستانعا دا، ماكسيمگە دە ءسال عانا ساتتىلىك جەتىسپەدى. جالپى العاندا، بىزدە مۇمكىندىكتەر بولدى. ويىن ستاديونداعى جانە ەكران الدىنداعى جانكۇيەرلەردىڭ كوڭىلىنەن شىقتى دەپ ويلايمىن، – دەدى ءالي اليەۆ.

ويىننىڭ كىمنىڭ كوڭىلىنەن شىققانىن، شىقپاعانىن جانكۇيەردىڭ ءوزى بىلە جاتار. ال مەنىڭ ويىمشا، ويىندى جەڭۋ ءۇشىن ساتتىلىك قانا ەمەس، كومانداعا ىنتا-جىگەر، نامىس، مىنەز كەرەك. وسىلار بولعاندا عانا قارسىلاس كوماندانىڭ قاقپاسىنىڭ كىلتىن تابۋعا بولادى.

ەندى قازاقستان قۇراماسى 4 قىركۇيەكتە ۋەلس جاساعىمەن وينايدى. ماتچ «استانا ارەنا» ستاديونىندا بولادى. ەسكە سالىپ وتسەم، بىلتىر ۇلتتىق قۇراما ۋەلستەن 1:3 ەسەبىمەن جەڭىلىپ، ليحتەنشتەيندى 2:0 ەسەبىمەن جەڭگەن بولاتىن.

قازاقستان ىرىكتەۋ تۋرنيرىندە J توبىندا ويناپ جاتىر. كوماندانىڭ كارسىلاستارى – بەلگيا، سولتۇستىك ماكەدونيا، ۋەلس پەن ليحتەنشتەين.

قازاقستان – سولتۇستىك ماكەدونيا – 0:1 (0:1)

گول: ترايكوۆسكي 33

ەسكەرتۋلەر: مالىي 50، قۋات 79 – مۋسليۋ 64، دەسپوتوۆسكي 81

قازاقستان: سەيسەن (ق)، استانوۆ، بىستروۆ، مالىي، ءالىپ، ۆوروگوۆسكي، چەسنوكوۆ، قۋات، تاعىبەرگەن (ك)، كەنجەبەك، سامورودوۆ.

قوسالقى قۇرام: زارۋتسكي (ق)، شايزادا (ق)، مۇحامەد، ساتپاەۆ، جۇمات، جاگوروۆ، جۋكوۆ، جۇماحانوۆ، زۋەۆ، تاپالوۆ، تولەۋباي، حالماتوۆ.

باس جاتتىقتىرۋشى: الي اليەۆ

سولتۇستىك ماكەدونيا: ديميترەۆسكي (ق)، دەسپوتوۆسكي، زايكوۆ، مۋسليۋ، اليوسكي، باردي (ك)، كوستادينوۆ، ەلماس، چۋرلينوۆ، ترايكوۆسكي، ميوۆسكي.

قوسالقى قۇرام: الەكسوۆسكي (ق)، يليەۆ (ق)، اشكوۆسكي، ەلەزي، مانەۆ، ميتروۆسكي، ستوەۆسكي، تراپانوۆسكي، اتانتاسوۆ، ريستوۆسكي، ستانكوۆسكي، توشەۆسكي.

باس جاتتىقتىرۋشىنىڭ كومەكشىسى: روبەرت ستويانوۆسكي

 

داستان كەنجالين،

استانا