Qazaqstan — Soltústik Makedonııa. Qatelik komandany keshirmeıdi

Búgin fýtboldan Qazaqstan ulttyq quramasy 2026 jylǵy álem chempıonaty irikteý týrnırinde taǵy bir qarsylasynan jeńildi. Bul joly komanda Soltústik Makedonııa jasaǵymen oınap,  óz alańynda 0:1 esebimen ese jiberdi.

Jalpy, match asa tartysty jáne qyzyqty boldy. Bul oıynda otandastarymyzdyń jeńis úshin qolda bar múmkindiktiń bárin jasady. Oıyn bastalysymen ulttyq qurama qarsylastardyń qaqpasyn ańdyp, qaýipti soqqylar jasap, esepti birinshi bolyp ashýǵa tyrysty.

Birinshi taımda ulttyq quramanyń jartylaı qorǵaýshysy Ǵalymjan Kenjebek jaqsy oıyn órnegimen kózge tústi. Ol alańda oıyndy jaqsy kóre bilip, jaqsy ashylyp, komandalastaryna ádemi pas berip otyrdy. Alaıda, dop torǵa túspeı, ulttyq qurama maqsatyna jete almaı jatty. Kerisinshe, birinshi taımda Soltústik Makedonııa jasaǵynyń joly bolyp ketti. Qonaqtar sapyndaǵy Aleksandar Traıkovskı 33-mınýtta Muhamedjan Seısen qorǵaǵan qaqpany dál kózdep, tablodaǵy esepti ózgertti.

Ekinshi taımda alań ıeleri esepti teńestirýge tyrysty. Oıynnyń sońynda Dastan Sátpaev, Alııar Muhammed, Aleksandr Zýev alańǵa shyqty. Osylardyń ishinde Sátpaevtyń gol salýǵa múmkindigi boldy. Ol qaqpany 40 metrden kózdegende onyń doby baǵanǵa tıip, gol bola jazdady. Munyń aldynda bir dop Makedonııa qaqpasynyń mańdaıshasyna tıip, keri qaıtqan bolatyn.

Bir ókinishtisi, otandastarymyz oıynnyń sońyna deıin qansha umtylsa da esh nátıje shyǵara almaı ketti. Bul matchta Qazaqstan quramynda gol sala alatyn birde-bir oıynshy bolǵan joq. Jalpy, quramada ıntýıııasy bar, alańda goldy seze biletin shabýylshy joq. Onyń ústine alańnyń ortasy únemi bos qala beredi. Oıynshylar keıde dopty shamadan kóp ýaqyt ustap, pasty kimge bererin bilmeı qalyp ta jatady. Makedonııanyń búgingi goly da Qazaqstan oıynshylarynyń kesirinen boldy. Eger Ashat Taǵybergen pasty alańnyń ortasynda turǵan Nuraly Álipke bermegende gol da bolmaıtyn edi dep oılaısyń. Al Nuraly Áliptiń qateligi ol pasty durys qabyldaı almady. Makedonııanyń oıynshylary osy múmkindikti tıimdi paıdalanyp, qaqpany dál kózdep, gol salyp ketti. Osylaısha, Qazaqstan quramasy 0:1 esebimen ese jiberdi. Al Makedonııa bolsa, osymen sońǵy 11 oıynda jeńilmeı, úılerine qaıtty.

Matchtan keıin Qazaqstan quramasynyń bas jattyqtyrýshysy Álı Álıev Soltústik Makedonııamen oıynǵa qatysty oıyn aıtty.

Bizdi qoldaýǵa kelgen barlyq jankúıerlerge alǵys aıtamyn. Jigitterge myń alǵys, olar bul matchqa tyńǵylyqty daıyndalyp, alańda baryn saldy. Biz el úshin, tý úshin sońyna deıin kúresemiz dep ýáde bergenbiz. Búgin jankúıerler tartysqa toly, jandy kúresti kórdi dep oılaımyn. Oıyn alańynyń ár bóliginde shynaıy shaıqas boldy.

Búgin bizge sáttilik joldas bolmady. Dastanǵa da, Maksımge de sál ǵana sáttilik jetispedi. Jalpy alǵanda, bizde múmkindikter boldy. Oıyn stadıondaǵy jáne ekran aldyndaǵy jankúıerlerdiń kóńilinen shyqty dep oılaımyn, – dedi Álı Álıev.

Oıynnyń kimniń kóńilinen shyqqanyn, shyqpaǵanyn jankúıerdiń ózi bile jatar. Al meniń oıymsha, oıyndy jeńý úshin sáttilik qana emes, komandaǵa ynta-jiger, namys, minez kerek. Osylar bolǵanda ǵana qarsylas komandanyń qaqpasynyń kiltin tabýǵa bolady.

Endi Qazaqstan quramasy 4 qyrkúıekte Ýels jasaǵymen oınaıdy. Match «Astana Arena» stadıonynda bolady. Eske salyp ótsem, byltyr ulttyq qurama Ýelsten 1:3 esebimen jeńilip, Lıhtenshteındi 2:0 esebimen jeńgen bolatyn.

Qazaqstan irikteý týrnırinde J tobynda oınap jatyr. Komandanyń karsylastary – Belgııa, Soltústik Makedonııa, Ýels pen Lıhtenshteın.

Qazaqstan – Soltústik Makedonııa – 0:1 (0:1)

Gol: Traıkovskı 33

Eskertýler: Malyı 50, Qýat 79 – Mýslıý 64, Despotovskı 81

Qazaqstan: Seısen (q), Astanov, Bystrov, Malyı, Álip, Vorogovskıı, Chesnokov, Qýat, Taǵybergen (k), Kenjebek, Samorodov.

Qosalqy quram: Zarýkıı (q), Shaızada (q), Muhamed, Satpaev, Jumat, Jagorov, Jýkov, Jumahanov, Zýev, Tapalov, Tóleýbaı, Halmatov.

Bas jattyqtyrýshy: Álı Álıev

Soltústik Makedonııa: Dımıtrevskı (q), Despotovskı, Zaıkov, Mýslıý, Alıoskı, Bardı (k), Kostadınov, Elmas, Chýrlınov, Traıkovskı, Mıovskı.

Qosalqy quram: Aleksovskı (q), Ilıev (q), Ashkovskı, Elezı, Manev, Mıtrovskı, Stoevskı, Trapanovskı, Atantasov, Rıstovskı, Stankovskı, Toshevskı.

Bas jattyqtyrýshynyń kómekshisi: Robert Stoıanovskı

 

Dastan KENJALIN,

ASTANA